بیجنگ (شِنہوا) چینی وزارت خارجہ کی ایک ترجمان نے کہا ہے کہ چین کو مشرق وسطیٰ میں کشیدگی میں اضافے پر گہری تشویش ہے اور امید کرتا ہے کہ متعلقہ فریقین مشرق وسطیٰ اور خلیجی خطے میں امن و سکون کی بحالی کی خاطر سازگار حالات پیدا کرنے کے لئے کام کریں گے۔وزارت خارجہ کی ترجمان ماؤ ننگ نے یہ بات بدھ کو معمول کی پریس بریفنگ کے دوران امریکہ اور ایران کے درمیان حالیہ دنوں میں ہونے والے دوطرفہ حملوں کے جواب میں کہی۔ماؤ نے کہا کہ دوبارہ چھڑنے والی جنگ کسی کے مفاد میں نہیں ہے۔ انہوں نے مزید کہا کہ چین امید کرتا ہے کہ متعلقہ فریقین امن کے موقع کو غنیمت جانیں گے، جنگ بندی کے معاہدے پر عمل کریں گے، مذاکرات کے تسلسل کو برقرار رکھیں گے اور سیاسی و سفارتی ذرائع سے تنازعات کے حل پر کاربند رہیں گے تاکہ جلد از جلد جامع اور دیرپا جنگ بندی کو ممکن بنایا جا سکے اور مشرق وسطیٰ و خلیجی خطے میں امن و سکون کی بحالی کے لئے سازگار حالات پیدا کئے جا سکیں۔