میڈرڈ (شِنہوا) سپین کے گالیشیا خطے کی علاقائی حکومت کے صدر الفونسو روئیدا نے کہا ہے کہ چین کی بڑی کارساز کمپنیوں میں سے ایک ایس اے آئی سی موٹر یورپ میں برقی گاڑیوں کی اپنی پہلی فیکٹری گالیشیا میں قائم کرے گی۔روئیدا نے بتایا کہ اس منصوبے میں ابتدائی سرمایہ کاری 20 کروڑ یورو (23 کروڑ 20 لاکھ امریکی ڈالر) ہوگی اور اس سے مقامی سطح پر روزگار کے 2 ہزار 300 سے زائد مواقع پیدا ہونے کی توقع ہے۔ فیکٹری کی تعمیر 2027 میں شروع ہوگی اور اسے 2028 کے آخر تک فعال کرنے کا ہدف رکھا گیا ہے۔روئیدا کے مطابق یہ فیکٹری فیرول بندرگاہ اور قریبی شہر آس پونتس کے درمیان قائم کی جائے گی اور اس کی سالانہ پیداواری صلاحیت ایک لاکھ 20 ہزار گاڑیاں ہوگی۔ اس کے علاوہ اس منصوبے میں مقامی بندرگاہ کے قریب ایک صنعتی زون بھی شامل ہوگا جو گاڑیوں کو اسمبل کرنے اور نقل و حمل کے لئے استعمال ہوگا۔انہوں نے کہا کہ اگرچہ یہ ایک “تزویراتی صنعتی منصوبہ” ہے اور اس کے لئے ابھی ایک طویل سفر باقی ہے، تاہم ان کی حکومت لائسنس جاری کرنے کے عمل کو تیز کرے گی۔یہ پیشرفت سپین کے وزیراعظم پیڈرو سانچز کے اپریل میں چین کے چار روزہ دورے کے بعد سامنے آئی۔ روئیدا نے مرکزی حکومت کے “مثالی” تعاون اور اس منصوبے کو خطے میں لانے کے عزم پر تشکر کا اظہار کیا۔