تہران (شِنہوا) ایرانی پارلیمنٹ کے سپیکر محمد باقر قالیباف نے کہا ہے کہ ایران اور امریکہ کے درمیان کسی بھی معاہدے میں تمام محاذوں خاص طور پر لبنان پر حملوں کا خاتمہ شامل ہونا چاہیے۔
ایرانی سرکاری خبر رساں ایجنسی ارنا کے مطابق انہوں نے یہ بات اپنے لبنانی ہم منصب نبیہ بری کے ساتھ ٹیلی فون پرگفتگو کے دوران کہی۔ انہوں نے کہا کہ اسرائیل کو لبنان کے خلاف اپنے حملے بند کرنا ہوں گے۔
انہوں نے کہا کہ حزب اللہ اور اس کی اتحادی تنظیم امل موومنٹ آج اپنے وطن اور پوری مسلم دنیا کا دفاع کر رہے ہیں۔ انہوں نے ایران اور لبنان کے درمیان تعلق کو ناقابل شکست قرار دیا۔
قالیباف نے اس بات پر زور دیا کہ ایران پورے لبنان میں جنگ بندی کے قیام کے لئے پرعزم ہے، جس میں ملک کے جنوبی علاقے بھی شامل ہیں۔
ارنا کے مطابق ایران کے مرکزی فوجی کمانڈ خاتم الانبیاء کے مرکزی صدر دفترنے اسرائیل کو خبردار کیا ہے کہ وہ بیروت اور اس کے جنوبی علاقے دہیہ پر بمباری سے باز رہے۔
ایک بیان میں اس کمانڈ نے شمالی اسرائیل کے رہائشیوں اور مقبوضہ فلسطینی علاقوں میں بسنے والے آبادکاروں کو خبردار کیا کہ اگر اسرائیلی حملے جاری رہے تو وہ علاقے خالی کر دیں۔