شگر (نیشنل ٹائمز) چیئرمین پاکستان پیپلز پارٹی بلاول بھٹو زرداری نے ضلع شگر میں ایک بڑے عوامی جلسے سے خطاب کرتے ہوئے گلگت بلتستان کے عوام کے لیے حقِ حاکمیت، حقِ ملکیت اور معاشی خودمختاری کے حصول کے عزم کا اعادہ کیا۔ جلسے کا اہتمام حلقہ شگر سے پاکستان پیپلز پارٹی کے امیدوار عمران ندیم نے کیا تھا۔بلاول بھٹو زرداری نے اپنے خطاب میں شگر کے عوام کا شکریہ ادا کرتے ہوئے کہا کہ انہوں نے گزشتہ تین نسلوں سے پاکستان پیپلز پارٹی کا ساتھ دیا ہے۔ انہوں نے کہا کہ مخالفین “زندہ ہے بھٹو، زندہ ہے” کے نعرے کو دبانا چاہتے تھے لیکن شگر کے عوام نے ان کی تمام کوششوں کو ناکام بنا دیا۔انہوں نے کہا کہ شہید ذوالفقار علی بھٹو نے ملک کو آئین دیا، عوامی حقوق کے لیے جدوجہد کی اور گلگت بلتستان کے عوام کے لیے سبسڈی جیسے تاریخی اقدامات کیے، جن کے ثمرات آج بھی عوام کو حاصل ہو رہے ہیں۔ انہوں نے شہید محترمہ بینظیر بھٹو کی جمہوریت اور عوامی حقوق کے لیے طویل جدوجہد کو بھی خراجِ عقیدت پیش کیا۔چیئرمین پیپلز پارٹی نے کہا کہ گزشتہ انتخابات میں ان کی جماعت کی متعدد نشستیں چھینی گئیں، تاہم اس بار عوام اپنے ووٹ کا تحفظ یقینی بنائیں۔ انہوں نے شگر کے عوام سے اپیل کی کہ سات جون کو تیر کے نشان پر مہر لگا کر عمران ندیم کو کامیاب بنائیں۔بلاول بھٹو زرداری نے کہا کہ گلگت بلتستان کو بھی وہی آئینی اور جمہوری حقوق ملنے چاہئیں جو اٹھارویں ترمیم کے ذریعے صوبوں کو حاصل ہوئے۔ ان کا کہنا تھا کہ گلگت بلتستان اور آزاد کشمیر کے معاملات کے فیصلے مقامی عوام کی مرضی کے مطابق ہونے چاہئیں اور خطے کے قدرتی وسائل پر پہلا حق مقامی آبادی کا ہے۔انہوں نے پاکستان پیپلز پارٹی کی فلاحی پالیسیوں کا ذکر کرتے ہوئے بے نظیر انکم سپورٹ پروگرام (بی آئی ایس پی)، تھر کول منصوبے، مفت علاج کی سہولیات اور کم آمدنی والے طبقات کے لیے تعمیر کیے جانے والے لاکھوں گھروں کو اپنی جماعت کی عوام دوست پالیسیوں کی مثال قرار دیا۔چیئرمین پیپلز پارٹی نے کہا کہ سندھ میں عالمی معیار کے مفت علاج کے مراکز قائم کیے گئے ہیں اور اگر عوام نے ان کے امیدوار کو کامیاب بنایا تو شگر میں بھی جدید طبی سہولیات فراہم کرنے کے لیے اقدامات کیے جائیں گے۔خطاب کے دوران انہوں نے خطے اور دنیا کی موجودہ صورتحال پر بھی اظہارِ خیال کیا اور امن، استحکام اور مہنگائی میں کمی کے لیے دعا کی۔ انہوں نے کہا کہ پاکستان پیپلز پارٹی ہمیشہ غریبوں، مزدوروں، کسانوں اور کمزور طبقات کی آواز بنی ہے اور آئندہ بھی عوامی حقوق کے لیے جدوجہد جاری رکھے گی۔جلسے کے اختتام پر بلاول بھٹو زرداری نے کارکنوں سے پارٹی کے حق میں نعرے لگوائے اور سات جون کے انتخابات میں بھرپور شرکت کی اپیل کی۔