بیجنگ (شِنہوا) چینی وزیراعظم لی چھیانگ نے کام کے مقامات پر حفاظت کو یقینی بنانے کے لئے ٹھوس کوششوں پر زور دیا ہے تاکہ لوگوں کی جان و مال کا موثر تحفظ کیا جا سکے اور مجموعی سماجی استحکام کو برقرار رکھا جا سکے۔
لی چھیانگ، جو کمیونسٹ پارٹی آف چائنہ (سی پی سی) کی مرکزی کمیٹی کے سیاسی بیورو کی قائمہ کمیٹی کے رکن بھی ہیں، نے یہ ہدایات محفوظ پیداوار کو یقینی بنانے کے حوالے سے جاری کردہ ایک حکم نامے میں دیں۔
وزیراعظم لی نے کہا کہ ملک بھر میں متعلقہ حکام کو خطرات اور خامیوں کی جانچ پڑتال کے معیار اور افادیت کو بہتر بنانا چاہیے۔ انہوں نے حکام پر زور دیا کہ وہ پیداواری حفاظت کے معاملات میں غیر قانونی اور ضوابط کے منافی اقدامات کے ساتھ ساتھ کسی بھی قسم کی جعل سازی کی سخت تفتیش کریں اور اس پر سزا دیں۔
لی چھیانگ نے کہا کہ کان کنی، آتش بازی، نقل و حمل اور تعمیرات جیسے اہم شعبوں کے لئے پوری صنعتی چینز میں حفاظتی نگرانی اور انتظام کو مضبوط بنانا انتہائی ضروری ہے۔ انہوں نے مزید کہا کہ متعلقہ عملے کو اپنی اپنی ذمہ داریاں نبھانی چاہئیں اور متعلقہ اقدامات کے نفاذ کو یقینی بنانا چاہیے تاکہ بڑے اور خاص طور پر سنگین حادثات کے بار بار رونما ہونے کا سختی سے سدباب کیا جا سکے۔
وزیر اعظم لی نے کہا کہ چونکہ چین اب سیلابی سیزن میں داخل ہو رہا ہے اس لئے سیلاب کی روک تھام اور قدرتی آفات کی صورت میں امدادی کاموں کی صورتحال روز بروز سنگین اور پیچیدہ ہوتی جا رہی ہے۔ انہوں نے نگرانی اور پیشگی انتباہ کے نظام کو تیز کرنے، ہنگامی تیاریوں کو بڑھانے اور بچاؤ و امداد کی صلاحیتوں کو مزید مضبوط بنانے پر زور دیا۔