ماسکو: (شاہد گھمن) روسی وزارتِ دفاع نے دعویٰ کیا ہے کہ خصوصی فوجی آپریشن کے دوران گزشتہ 24 گھنٹوں میں یوکرینی مسلح افواج کے 1320 سے زائد فوجی ہلاک یا زخمی ہوئے ہیں، جبکہ متعدد فوجی اہداف کو کامیابی سے نشانہ بنایا گیا ہے۔

وزارتِ دفاع کی جانب سے جاری بیان کے مطابق مختلف محاذوں پر روسی فوجی گروپوں کی کارروائیوں کے نتیجے میں یوکرین کو بھاری جانی نقصان اٹھانا پڑا۔

بیان میں کہا گیا کہ  سینٹر  جنگی گروپ کے علاقے میں سب سے زیادہ 340 سے زائد یوکرینی فوجی ہلاک یا زخمی ہوئے، جبکہ  ایسٹ  گروپ کی کارروائیوں میں 455 سے زائد اہلکاروں کا نقصان ہوا۔

روسی وزارتِ دفاع کے مطابق  نارتھ  گروپ کے محاذ پر 200 تک،  ویسٹ  گروپ کے علاقے میں 180 سے زائد،  ساؤتھ  گروپ کے محاذ پر 85 سے زائد اور  دنیپر  گروپ کے علاقے میں 60 تک یوکرینی فوجیوں کو نقصان پہنچا۔

بیان میں مزید کہا گیا کہ روسی فضائی دفاعی نظام نے گزشتہ چوبیس گھنٹوں کے دوران 10 گائیڈڈ فضائی بم، ایک امریکی ساختہ ہائی مارز راکٹ اور 352 بغیر پائلٹ طیاروں کو تباہ کیا۔

روسی وزارتِ دفاع کے مطابق یوکرین کی جانب سے روسی شہری تنصیبات پر مبینہ حملوں کے جواب میں روسی افواج نے طویل فاصلے تک مار کرنے والے جدید ہتھیاروں اور ڈرونز کے ذریعے یوکرین کے فوجی ہوائی اڈوں، توانائی، ایندھن اور ٹرانسپورٹ کے بنیادی ڈھانچے کو نشانہ بنایا۔

بیان میں دعویٰ کیا گیا کہ ان حملوں کے تمام اہداف کامیابی سے نشانہ بنائے گئے اور مقررہ فوجی تنصیبات کو نقصان پہنچایا گیا۔

روسی وزارتِ دفاع کے اعداد و شمار کے مطابق خصوصی فوجی آپریشن کے آغاز سے اب تک روسی افواج 671 طیارے، 284 ہیلی کاپٹر، ایک لاکھ 53 ہزار سے زائد ڈرونز، 29 ہزار سے زائد ٹینک اور بکتر بند گاڑیاں، 1727 راکٹ لانچر سسٹمز اور 35 ہزار سے زائد توپ خانے کے یونٹس تباہ کر چکی ہیں۔

آزاد ذرائع سے روسی وزارتِ دفاع کے ان اعداد و شمار کی فوری طور پر تصدیق نہیں ہو سکی، جبکہ یوکرینی حکام نے ان دعوؤں پر تاحال کوئی ردعمل جاری نہیں کیا۔