بیجنگ (شِنہوا) چین اور یورپی یونین (ای یو) تجارت اور سرمایہ کاری سے متعلق ایک مشاورتی نظام کے قیام پر بات چیت کر رہے ہیں اور اس حوالے سے متعلقہ مذاکرات بھی منعقد کئے جائیں گے۔
چین کی وزارت تجارت کے ایک ترجمان نے یورپی کمیشن کے کالج آف کمشنرز کی جانب سے چین-یورپی یونین تعلقات سے متعلق جائزہ اجلاس کے بارے میں میڈیا کے سوال کے جواب میں کہا کہ چین اور یورپی یونین کے درمیان رابطے اور بات چیت کا عمل مسلسل اور ہموار رہا ہے۔
ترجمان نے کہا کہ چین اور یورپی یونین برابری اور باہمی فائدے کی بنیاد پر اہم اقتصادی اور تجارتی شراکت دار ہیں۔ انہوں نے مزید کہا کہ چین توقع کرتا ہے کہ یورپی یونین عالمی تجارتی تنظیم (ڈبلیو ٹی او) کے قواعد کی پاسداری کرے گی، آزاد تجارت اور منصفانہ مسابقت کو برقرار رکھے گی اور تحفظ پسندی اور یکطرفہ اقدامات کی سختی سے مخالفت کرے گی۔
ترجمان نے امید ظاہر کی کہ یورپی یونین چین کے ساتھ مل کر دونوں فریقوں کے رہنماؤں کے درمیان طے پانے والے اتفاق رائے پر عملدرآمد کرے گی، اختلافات اور تجارتی تنازعات کو مذاکرات اور مشاورت کے ذریعے حل کرے گی اور چین-یورپی یونین اقتصادی و تجارتی تعلقات کی مستحکم اور صحت مند ترقی کو فروغ دے گی۔
انہوں نے خبردار کیا کہ اگر یورپی فریق یکطرفہ طور پر نئے تجارتی اقدامات متعارف کرانے اور امتیازی پابندیاں عائد کرنے پر اصرار کرتا ہے تو چین بھرپور ردعمل دے گا اور اپنے مفادات کے تحفظ کے لئے موثر اقدامات کرے گا۔