چھونگ چھنگ (شِنہوا) چین کے جنوب مغربی شہر چھونگ چھنگ میں آٹھویں مغربی چین بین الاقوامی میلہ برائے سرمایہ کاری وتجارت کا آغاز ہوگیا، جہاں 212 معاہدوں پر دستخط کئے گئے جن کی مجموعی مالیت 150 ارب یوآن (تقریباً 22 ارب امریکی ڈالر) سے زائد ہے۔
“نیا مغربی چین، نئی پیداوار، نئی خدمات” کے موضوع پر منعقدہ یہ میلہ 24 مئی تک جاری رہے گا، جس میں تقریباً 40 سیمپوزیم، سرمایہ کاری اور تجارتی روابط کی سرگرمیاں اور صارفین کے فروغ سے متعلق پروگرام شامل ہیں۔
انتظامی کمیٹی کے مطابق دستخط شدہ منصوبے جدید مواد اور توانائی سمیت مختلف شعبوں پر مشتمل ہیں۔ ان میں سے 57 منصوبوں میں ہر ایک کی سرمایہ کاری ایک ارب یوآن سے زائد ہے۔
ایک لاکھ 50 ہزار مربع میٹر پر پھیلے اس سال کے میلے میں 50 ممالک اور خطوں سے تقریباً 1400 کمپنیوں نے شرکت کی ہے جبکہ برطانیہ اعزازی مہمان ملک کے طور پر شریک ہے۔
میلے کے دوران پہلی بار “چھونگ چھنگ میں سرمایہ کاری کے مواقع” کے نام سے ایک فہرست بھی جاری کی گئی۔ اس فہرست میں تعاون کے 277 منصوبے شامل ہیں جن کا مقصد جدید پیداوار، ماحول دوست اور کم کاربن ترقی اور ڈیجیٹل معیشت کے شعبوں میں چھونگ چھنگ میں موجود مواقع کو اجاگر کرنا ہے۔