اسلام آباد(نیشنل ٹائمز) پاکستان سمیت 10 ممالک نے غزہ کے شہریوں کے لیے امداد لے جانے والے گلوبل صمود فلوٹیلا پر اسرائیلی حملوں کی شدید ترین الفاظ میں مذمت کی۔

دفتر خارجہ کے مطابق مشترکہ مذمت کرنے والے ممالک میں پاکستان، ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ اور سپین شامل ہیں، ان ممالک کے وزرائے خارجہ نے مشترکہ مذمتی بیان جاری کیا ہے۔

مشترکہ بیان میں کہا گیا ہے کہ گلوبل صمود فلوٹیلا ایک پُرامن شہری اور انسانی ہمدردی پر مبنی اقدام ہے، اس کا مقصد فلسطینی عوام کی سنگین انسانی مشکلات کی جانب عالمی توجہ مبذول کروانا ہے۔

وزرائے خارجہ نے بین الاقوامی پانیوں میں سابقہ فلوٹیلاز پر اسرائیلی کارروائیوں پر شدید تشویش کا اظہار کیا، انہوں نے شہری کشتیوں اور انسانی حقوق کے کارکنوں کو نشانہ بنانے والے مسلسل اقدامات کی مذمت کی۔

یہ بھی پڑھئے: قطر کی غزہ جانے والے قافلے روکنے، امدادی کارکنوں کو حراست میں لینے کی مذمت

وزرائے خارجہ نے فلوٹیلا میں شامل شہری شرکاء کی حفاظت اور سلامتی پر گہری تشویش ظاہر کی اور کہا کہ کشتیوں پر حملے اور کارکنوں کی من مانی گرفتاری بین الاقوامی قانون اور بین الاقوامی انسانی قانون کی کھلی خلاف ورزی ہیں۔

مشترکہ بیان میں مطالبہ کیا گیا کہ گرفتار تمام کارکنوں کو فوری طور پر رہا کیا جائے، گرفتار تمام کارکنوں کے حقوق اور وقار کا مکمل احترام یقینی بنایا جائے۔

وزرائے خارجہ نے زور دیا کہ پُرامن انسانی ہمدردی کی سرگرمیوں پر بار بار حملے بین الاقوامی قانون اور آزادیٔ جہاز رانی کے اصولوں کی مسلسل خلاف ورزی ہیں، عالمی برادری سے مطالبہ کرتے ہیں کہ وہ اپنی قانونی اور اخلاقی ذمہ داریاں پوری کرے۔

وزرائے خارجہ نے یہ بھی مطالبہ کیا کہ عالمی برادری شہریوں و انسانی امدادی مشنز کے تحفظ کو یقینی بنائے، ان خلاف ورزیوں پر احتساب کو یقینی بنانے اور سزا سے استثنیٰ کے خاتمے کے لیے عملی اقدامات کیے جائیں۔