بیجنگ (شِنہوا) چینی صدر شی جن پھنگ اور ان کے روسی ہم منصب ولادیمیر پوتن نے اتوار کے روز چین کے شمال مشرقی صوبے حئی لونگ جیانگ کے دارالحکومت ہاربن میں شروع ہونے والی 10ویں چین۔روس ایکسپو کے موقع پر تہنیتی خطوط ارسال کئے ہیں۔
اپنے پیغام میں شی جن پھنگ نے کہا کہ اس سال چین اور روس کی تزویراتی شراکت داری کے 30 برس اور اچھی ہمسائیگی و دوستانہ تعاون کے معاہدے کی 25 ویں سالگرہ منائی جا رہی ہے۔ انہوں نے کہا کہ دونوں ممالک کی مشترکہ کوششوں سے مختلف شعبوں میں دوطرفہ تعاون مسلسل مضبوط ہوا ہے اور اس کے نتیجے میں نمایاں کامیابیاں حاصل ہوئی ہیں۔
چینی صدر نے اپنے خط میں امید ظاہر کی کہ یہ نمائش دونوں ممالک کے مختلف شعبوں کے لئے جغرافیائی قربت اور باہمی فوائد سے بھرپور استفادہ کرنے، عملی تعاون کو مزید فروغ دینے، اقتصادی و سماجی ترقی تیز کرنے اور دونوں ممالک کے عوام کی خوشحالی میں اضافہ کرنے کا موقع فراہم کرے گی۔ انہوں نے کہا کہ اس سے نئے دور میں چین۔روس جامع تزویراتی شراکت داری کو مستحکم اور طویل المدتی بنیادوں پر آگے بڑھانے میں مدد ملے گی۔
اپنے پیغام میں روسی صدر پوتن نے کہا کہ یہ نمائش دونوں ممالک کے درمیان سب سے بڑی نمائش کی صورت اختیار کر چکی ہے جو دونوں فریقوں کے درمیان براہ راست اور گہرے مکالمے کے لئے ایک موثر پلیٹ فارم فراہم کرتی ہے۔
روسی صدر نے کہا کہ انہیں یقین ہے کہ یہ نمائش مثبت نتائج دے گی، باہمی مفاد پر مبنی تعاون کے نئے مواقع پیدا کرے گی اور دونوں ممالک کے عوام کے لئے فائدہ مند ثابت ہوگی۔