بیجنگ (شِنہوا) امریکی کاروباری اداروں نے چین کی مارکیٹ اور مینوفیکچرنگ نظام پر اپنے اعتماد کا اعادہ کیا ہے جس کا اظہار اس سال اب تک چین میں سرمایہ کاری بڑھانے کے متعدد منصوبوں سے ہوتا ہے۔
چین میں سپلائی کے اپنے نظام کو مقامی بنانے کی سمت میں ایک اہم قدم اٹھاتے ہوئے ضروری تیل تیار کرنے والی بڑی کمپنی ڈوٹیرا نے مارچ میں شنگھائی میں مینوفیکچرنگ کی سہولیات تعمیر کرنے کے منصوبوں کا اعلان کیا جو اس کے موجودہ چینی ہیڈکوارٹرز اور ریسرچ و ڈیویلپمنٹ مرکز میں اضافہ ہوگا۔
یہ اقدام چینی مارکیٹ پر کمپنی کے طویل مدتی اعتماد کی عکاسی کرتا ہے اور اس سے سپلائی نظام کی کارکردگی میں بہتری کی توقع ہے۔
ڈوٹیرا چائنہ کے صدر اوون میسک نے کہا کہ اس اقدام سے تحقیق و ترقی، مینوفیکچرنگ اور سیلز پر مشتمل ایک مکمل صنعتی سلسلہ بنانے میں مدد ملے گی جو مستقبل کی ترقی کے لئے کمپنی کی اختراع کو مقامی پختہ مینوفیکچرنگ ایکو سسٹم کے ساتھ ہم آہنگ کرے گی۔
کمپنی شنگھائی میں منعقد ہونے والی چین بین الاقوامی درآمدی نمائش میں مسلسل 9 ویں سال شرکت کرے گی۔ 2018 میں پہلی نمائش کے دوران کمپنی نے محض 9 مربع میٹر کے سٹال سے آغاز کیا تھا، جہاں اس نے 38 کروڑ یوآن (تقریباً 5 کروڑ 55 لاکھ امریکی ڈالر) کے خریداری کے معاہدے کئے تھے۔ اس سال اس کی نمائش کا رقبہ بڑھ کر 300 مربع میٹر تک پہنچ جائے گا۔
ڈوٹیرا، ٹیسلا، ایپل، ایلی للی اور ایکسن موبل سمیت ان متعدد امریکی کمپنیوں کی نمائندگی کرتی ہے جو چین کی مینوفیکچرنگ کی مہارت اور اس کی بہت بڑی مارکیٹ سے فائدہ اٹھانے کی خواہشمند ہیں اور ملک میں بڑی کامیابی حاصل کر چکی ہیں۔