اسلام آباد (نیشنل ٹائمز) حکومت نے ایندھن کے تحفظ اور اضافی کفایت شعاری اقدامات کے تحت نافذ پابندیوں میں 13 جون 2026ء تک توسیع کر دی ہے۔ اس حوالے سے کابینہ ڈویژن کی جانب سے باضابطہ نوٹیفکیشن جاری کر دیا گیا ہے۔ نوٹیفکیشن کے مطابق وزیراعظم نے ایندھن کے تحفظ اور کفایت شعاری اقدامات کی نگرانی و عملدرآمد کمیٹی کی سفارشات پر فوری طور پر ان پابندیوں میں توسیع کی منظوری دی۔ جاری نوٹیفکیشن کے تحت سرکاری گاڑیوں کے لیے ایندھن کی فراہمی میں 50 فیصد کمی برقرار رہے گی، جبکہ 60 فیصد سرکاری گاڑیاں بدستور بند رکھی جائیں گی۔ حکومت کی جانب سے غیر ملکی دوروں اور سرکاری سفری اخراجات پر عائد مکمل پابندی بھی برقرار رکھنے کا فیصلہ کیا گیا ہے۔ نوٹیفکیشن میں مزید کہا گیا ہے کہ اس سلسلے میں پہلے سے دی گئی مخصوص استثنیٰ بدستور برقرار رہیں گی۔