واشنگٹن(نیشنل ٹائمز) آئی ایم ایف نے پاکستان سے ٹیکس نیٹ بڑھانے اور اصلاحات جاری رکھنے پر زور دیا ہے۔

آئی ایم ایف نے بجلی، گیس اور پٹرولیم قیمتیں لاگت کے مطابق رکھنے کی ہدایت کر دی، سرکاری اداروں کی نجکاری اور اصلاحات تیز کرنے کا بھی مطالبہ کیا ہے، سماجی تحفظ اور تعلیم و صحت پر اخراجات بڑھانے کی بھی ہدایت کر دی، موسمیاتی تبدیلیوں سے نمٹنے کیلئے اصلاحات جاری رکھنے پر زور دیا گیا۔

آئی ایم ایف کے ایگزیکٹو بورڈ اجلاس کے جاری کردہ اعلامیہ کے مطابق پاکستان کے لئے 1.4 ارب ڈالر کے موسمیاتی تبدیلی فیسیلیٹی آر ایس ایف کے تحت 22 کروڑ ڈالر منظور کئے، اعلامیہ میں کہا گیا ہے کہ آئی ایم ایف نے پاکستان کیلئے 1.32ارب ڈالر کی منظوری دے دی۔

آئی ایم ایف نے اعلامیہ میں کہا کہ پاکستان کی معیشت میں استحکام آ رہا ہے، مشرق وسطیٰ جنگ کے باوجود پاکستان نے معاشی اہداف حاصل کئے، پاکستان کو کاروباری وسعت کے لئے مسابقت کو مقابلے کو فروغ دینا ہوگا، مسابقت سے پیداواری شعبہ ترقی کرے گا۔

آئی ایم ایف کے مطابق معاشی اصلاحات کے ذریعے پاکستان طویل مدت معاشی گروتھ حاصل کرسکتا ہے، مالی سال 2026ء میں پاکستان کی معاشی شرح نمو 3.6 فیصد رہنے کا امکان ہے، مہنگائی کی شرح رواں مالی سال میں 7.2 فیصد رہنے کا تخمینہ ہے۔

جاری کردہ اعلامیہ میں کہا گیا کہ پاکستان کے زرمبادلہ ذخائر 17.5 ارب ڈالر تک پہنچنے کی توقع ہے، رواں مالی سال پاکستان میں بے روزگاری کی شرح 6.9 فیصد رہنے کا امکان ہے، رواں مالی سال قرض معیشت کا 73.8 فیصد رہ سکتے ہیں۔

اعلامیہ میں مزید کہا گیا کہ سٹیٹ بینک نے بروقت اقدامات سے سخت مانیٹری پالیسی برقرار رکھی، سٹیٹ بینک کی پالیسی کا مقصد مہنگائی کو قابو میں رکھنا ہے، گھریلو قیمتوں اور اجرتوں پر ممکنہ دباؤ کی مانیٹرنگ جاری رکھی جائے۔

آئی ایم ایف کے مطابق ایکسچینج ریٹ میں لچک معاشی جھٹکوں کے خلاف اہم ہے، زرمبادلہ ذخائر کی بحالی کا عمل جاری رکھنے کی ضرورت ہے، فارن ایکسچینج مارکیٹ میں مزید وسعت اور اصلاحات ضروری ہیں، مالیاتی استحکام کیلئے بینکوں کا مناسب سرمایہ برقرار رکھنا ضروری ہے۔