اسلام آباد (نیشنل ٹائمز)پی ٹی آئی رہنما اسد قیصر نے کہا ہے نواز شریف اور اسحاق ڈار اتنی کم آمدن میں ایک عام آدمی کا بجٹ تیار کرکے دکھا دیں، انہوں نے عملاً عوام کو خودکشیوں پر مجبور کردیا ،ان کو پتا ہے ہمیں ووٹ لینے ہی نہیں،ویسے ہی مل جانے ہیں۔ان خیالات کا اظہار انہوں نے ایک تقریب سے خطاب کرتے ہوئے کیا۔اسد قیصر نے مزید کہا مہنگائی کی وجہ سے لوگ خودکشی کر رہے ہیں، پنجاب کے کسان رل رہے ہیں، گندم کی کم سے کم سپورٹ پرائس کا تعین نہیں کیا گیا،کسان سستے داموں اپنی فصلیں بیچ رہے ہیں۔انہوں نے مزیدکہا کہ آپ نے افغانستان کے ساتھ بارڈرز بند کئے ہوئے ہیں، دنیا کے تجارتی روٹس کھل رہے ہیں،دنیا میں تو جنگوں میں بھی کاروبار کھلا ہوتا ہے ، آپ گندم، گنا اور تمباکو کے کاشتکاروں کو دیکھیں، ایک کاشتکار بھی ایسا نہیں جو اس حکومت سے خوش ہو۔پی ٹی آئی رہنما نے کہا کہ اس وفاقی حکومت سے مزدور خوش ہے نہ سرمایہ کار ،حکومت بتائے کتنی سرمایہ کاری لے کر آئی ، یہ مکمل طور پر ناکام حکومت ہے کیونکہ اس کے پاس عوامی مینڈیٹ نہیں ہے ، ایک بات یاد رکھیں ہم سیاسی لوگ ہیں، اپنی سیاسی و جمہوری جدوجہد جاری رکھیں گے ،ان کے سامنے سرنگوں نہیں ہوں گے ۔