اسلام آباد (نیشنل ٹائمز) فیلڈ مارشل سید عاصم منیر نے پاک فوج میں اپنی شاندار خدمات کے 40 سال مکمل کر لیے ہیں۔ وہ 1986 میں 17ویں آفیسرز ٹریننگ اسکیم (OTS) کے تحت 23 فرنٹیئر فورس رجمنٹ میں کمیشن حاصل کرکے فوج میں شامل ہوئے۔

اپنے طویل کیریئر کے دوران انہوں نے متعدد اہم عہدوں پر خدمات انجام دیں، جن میں ملٹری انٹیلی جنس (MI)، انٹر سروسز انٹیلی جنس (ISI)، کور کمانڈر 30 کور، کوارٹر ماسٹر جنرل (QMG) اور فورس کمانڈر ناردرن ایریاز (FCNA) شامل ہیں۔

فیلڈ مارشل سید عاصم منیر نے نومبر 2022 میں چیف آف آرمی اسٹاف (COAS) کا عہدہ سنبھالا اور 2025 میں “معرکۂ حق” کے بعد انہیں فیلڈ مارشل کے عہدے پر ترقی دی گئی۔

انہوں نے بطور آرمی چیف 1,233 دن جبکہ فیلڈ مارشل کے طور پر 330 دن خدمات انجام دی ہیں۔ سعودی عرب میں تعیناتی کے دوران وہ حافظِ قرآن بھی بنے۔

دفاعی ماہرین کے مطابق ان کی قیادت نے پاکستان کے دفاع کو مزید مضبوط بنانے کے ساتھ ساتھ خطے میں استحکام، امن اور سفارتی روابط کے فروغ میں بھی اہم کردار ادا کیا ہے۔