لاہور: وزیراعلیٰ پنجاب مریم نواز شریف نے ایکس پر اپنے پیغام میں کہا ہے کہ پاکستان ایک تاریخی لمحے سے گزر رہا ہے جس میں قومی یکجہتی کو استحکام ملا ہے اور ہر پاکستانی فخر محسوس کر رہا ہے۔
انہوں نے کہا کہ آج کا دن پاکستانی قوم کی طاقت، وقار اور غیر متزلزل عزم کو دنیا کے سامنے اجاگر کرتا ہے۔
مریم نواز کے مطابق اللہ تعالیٰ نے وزیرِ اعظم محمد شہباز شریف، فیلڈ مارشل عاصم منیر اور نائب وزیرِ اعظم محمد اسحاق ڈار کو غیر معمولی اعزاز سے نوازا، جن کی فیصلہ کن اور جرات مندانہ قیادت کے باعث ایک ممکنہ تباہ کن تصادم کو ٹالا گیا۔
انہوں نے مزید کہا کہ اس قیادت کی بدولت بے شمار معصوم جانیں محفوظ رہیں اور دنیا کو ایک بڑے سانحے سے بچا لیا گیا، جو حقیقی قیادت کی اصل روح ہے۔
اپنے پیغام میں وزیراعلیٰ پنجاب نے یہ بھی کہا کہ پاکستان کی قیادت نے ملک کو نئی خوداعتمادی اور عالمی سطح پر وقار دیا ہے، جس سے ہر پاکستانی کو فخر محسوس ہو رہا ہے۔