اسلام آباد/ریاض: سعودی عرب کی وزارتِ دفاع کے مطابق پاکستان کا ایک فوجی دستہ دوطرفہ اسٹریٹیجک دفاعی معاہدے کے تحت کنگ عبدالعزیز ایئر بیس پہنچ گیا ہے۔
ایکس پر جاری بیان میں کہا گیا کہ اسلامی جمہوریہ پاکستان کا یہ دستہ مشرقی علاقے میں واقع ائیر بیس پر تعینات کیا گیا ہے۔
وزارتِ دفاع کے مطابق یہ پاکستانی دستہ پاک فضائیہ کے لڑاکا اور معاون طیاروں پر مشتمل ہے، جس کا مقصد دونوں ممالک کے درمیان دفاعی تعاون کو مضبوط بنانا، آپریشنل تیاری کو بہتر بنانا اور خطے میں امن و استحکام کو فروغ دینا ہے۔
واضح رہے کہ ستمبر 2025 میں ریاض میں پاکستان اور سعودی عرب کے درمیان اسٹریٹیجک باہمی دفاعی معاہدہ طے پایا تھا، جس کے تحت کسی ایک ملک کے خلاف جارحیت کو دونوں کے خلاف تصور کیا جائے گا۔
اس معاہدے پر سعودی ولی عہد محمد بن سلمان اور وزیرِ اعظم شہباز شریف نے دستخط کیے تھے، جس کا مقصد مشترکہ دفاعی تعاون کو فروغ دینا ہے۔
بلوم برگ کے مطابق مشرق وسطیٰ میں کشیدگی کے تناظر میں دونوں ممالک اس معاہدے پر متعدد بار مشاورت کر چکے ہیں۔
