اسلام آباد (نیشنل ٹائمز) وزیر اعظم کے مشیر سیاسی امور رانا ثنا اللہ نے کہا حالات کا مقابلہ کریں ، گریبان نہ پکڑیں ، چند عناصر موجودہ حالات میں عوام کو گمراہ کرنے کی کوشش کر رہے ہیں، دنیا کے مختلف ممالک میں پٹرول ڈیزل دستیاب ہی نہیں ،جنگ رہی تو زیادہ برے حالات کا سامنا کرنا پڑسکتا ہے ۔ اسلام آباد میں پریس کانفرنس کرتے ہوئے رانا ثنااللہ نے کہا کہ حکومت کفایت شعاری اقدامات پر عمل پیرا ہے ، کسان اور موٹر سائیکل رکھنے والوں کو ریلیف فراہم کیا جا رہا ہے ، عوام کو ریلیف کی فراہمی کیلئے وزیراعظم نے گزشتہ روز اجلاس کی صدارت کی، گڈز ٹرانسپورٹ کے کرایوں کو مستحکم رکھنے کیلئے سبسڈی دی جا رہی ہے ۔رانا ثنااللہ نے کہا کہ حکومت نے قیمتوں کو کم رکھنے کوشش کی ہے ، حکومت کوشش کر رہی ہے کہ یہ جنگ بند ہو، ہمیں چاہیے کہ ہم اپنے ملک کو مضبوط کریں، اپنے آپ کو اس وقت سیاسی مقاصد سے اوپر رکھیں۔مشیر وزیر اعظم نے کہا کہ اگر یہ جنگ اسی طرح جاری رہتی ہے تو ہوسکتا ہے پوری دنیا کو اس سے بھی زیادہ برے حالات کا سامنا کرنا پڑے ، خطے میں کشیدگی کے باعث پٹرولیم مصنوعات کی قیمتوں میں اضافہ ہوا، ٹارگٹڈ سبسڈی کے ذریعے عام آدمی کو ریلیف فراہم کیا جا رہا ہے ۔