اسلام آباد (نیشنل ٹائمز) وفاقی حکومت نے پیٹرولیم مصنوعات کی قیمتوں میں نمایاں اضافے کے ساتھ موٹرسائیکل سواروں کے لیے خصوصی ریلیف پیکج کا اعلان کر دیا ہے، جس کے تحت ماہانہ 20 لیٹر پیٹرول رعایتی قیمت پر فراہم کیا جائے گا۔

وزیر خزانہ سینیٹر محمد اورنگزیب نے نیوز کانفرنس سے خطاب کرتے ہوئے بتایا کہ موٹرسائیکل سواروں کو پیٹرول پر 100 روپے فی لیٹر تک سبسڈی دی جائے گی، تاکہ مہنگائی کے اثرات سے عام شہری کو جزوی تحفظ فراہم کیا جا سکے۔ انہوں نے کہا کہ یہ سہولت ابتدائی طور پر محدود مدت کے لیے دی جائے گی۔

انہوں نے مزید کہا کہ حکومت نے انٹرسٹی ٹرانسپورٹ اور مال بردار گاڑیوں کے لیے بھی ڈیزل پر 100 روپے فی لیٹر سبسڈی دینے کا فیصلہ کیا ہے، تاکہ اشیائے ضروریہ کی ترسیل اور عوامی آمد و رفت پر بوجھ کم کیا جا سکے۔

دوسری جانب حکومت نے 3 اپریل سے پیٹرول اور ڈیزل کی قیمتوں میں بڑے اضافے کا اعلان بھی کیا ہے۔ نئی قیمتوں کے مطابق پیٹرول 458 روپے فی لیٹر جبکہ ڈیزل 520 روپے فی لیٹر مقرر کیا گیا ہے، جو ملکی تاریخ کی بلند ترین سطح ہے۔

حکومت کا مؤقف ہے کہ عالمی منڈی میں تیل کی قیمتوں میں غیر معمولی اضافے کے باعث یہ فیصلے ناگزیر تھے، تاہم کم آمدنی والے طبقے کو ریلیف دینے کے لیے ہدفی سبسڈی کا نظام متعارف کرایا گیا ہے۔