بیجنگ (شِنہوا) بیجنگ میں جاری کردہ “چائنہ یونیکورن کمپنیز ڈیویلپمنٹ رپورٹ 2026” تیزی سے ترقی کرنے والے کاروباری اداروں کے لئے ایک بڑے مرکز کے طور پر چین کی حیثیت اجاگر کرتی ہے۔ منگل کو بیجنگ ایوننگ نیوز کی رپورٹ کے مطابق چین 416 یونیکورن کمپنیوں کا مسکن ہے جو کہ مجموعی عالمی تعداد کا تقریباً 30 فیصد بنتی ہیں اور اس لحاظ سے چین دنیا میں دوسرے نمبر پر ہے۔
اخبار کے مطابق امریکہ 49.8 فیصد حصے کے ساتھ اس فہرست میں پہلے نمبر پر ہے۔
چینی یونیکورن کمپنیوں کی اوسط مالیت 3.869 ارب امریکی ڈالر تک پہنچ گئی ہے، جبکہ یونیکورن کمپنیوں کی تعداد اور ان کی مالیت دونوں ہی 3سال کی بلند ترین سطح پر پہنچ چکی ہیں۔
اخبار نے ژونگ گوان کون یونیکورن کمپنی ڈیویلپمنٹ الائنس کے سربراہ شوان ہونگ کے حوالے سے بتایا کہ “ہارڈ ٹیکنالوجیز”، جن میں مصنوعی ذہانت سرفہرست ہے، یونیکورن کمپنیوں کے درمیان مرکز نگاہ بن چکی ہیں۔
شوان کے مطابق 2025 میں اے آئی سیکٹر 69 کمپنیوں اور 638 ارب امریکی ڈالر کی مجموعی مالیت کے ساتھ تمام شعبوں میں پہلے نمبر پر رہا۔ اس وقت تین چوتھائی سے زائد یونیکورن کمپنیاں “ہارڈ ٹیکنالوجی” کے دائرے سے تعلق رکھتی ہیں جو کل مالیت کا تقریباً 80 فیصد بنتی ہیں۔