کیپ ٹاؤن (شِنہوا) چین- جنوبی افریقہ تجارتی تعاون فورم کیپ ٹاؤن میں منعقد ہوا، جس میں دونوں ممالک کی کمپنیوں کے نمائندوں نے زراعت، پیداوار، توانائی، کان کنی، مالیات، گاڑی سازی کی صنعت اور لاجسٹکس جیسے شعبوں میں تعاون کو فروغ دینے پر تبادلہ خیال کیا۔
چین- جنوبی افریقہ اقتصادی و تجارتی تعاون فورم کا انعقاد بین الاقوامی تجارت کو فروغ دینے کی چینی کونسل (سی سی پی آئی ٹی) اور جنوبی افریقہ کے محکمہ تجارت، صنعت اور مسابقت نے مشترکہ طور پر کیا تھا، جس میں 350 سے زیادہ افراد نے شرکت کی۔
جنوبی افریقہ کے نائب صدر پال ماشاتیلے نے کہا کہ دونوں ممالک کے درمیان مشترکہ ترقی کے لئے حال ہی میں طے پانے والا اقتصادی شراکت داری فریم ورک معاہدہ ان چینی کمپنیوں کے اخراجات میں نمایاں کمی لائے گا جو جنوبی افریقہ کی مصنوعات درآمد کرتی ہیں جبکہ مقامی کمپنیوں کے لئے اپنی رسائی اور مسابقت بڑھانے کے نئے مواقع پیدا کرے گا۔
سی سی پی آئی ٹی کے چیئرمین رین ہونگ بن نے کہا کہ اس فورم کا مقصد دونوں ممالک کی کاروباری برادریوں کے درمیان معاشی اور تجارتی تعاون کو وسعت دینے میں مدد فراہم کرنا، صنعتی ہم آہنگی کو فروغ دینا اور زیادہ وسیع دائرہ کار، وسیع شعبوں اور گہری سطح پر باہمی فائدہ مند اور کامیاب نتائج حاصل کرنے میں مدد فراہم کرنا ہے۔
انہوں نے کہا کہ سی سی پی آئی ٹی دونوں سربراہان مملکت کے درمیان طے پانے والے اہم اتفاق رائے پر مکمل عملدرآمد کرے گی، اعلیٰ معیار کے اقتصادی اور تجارتی پلیٹ فارمز کی تعمیر اور بہتر پیشہ ورانہ خدمات کی فراہمی کے لئے جنوبی افریقہ کے شراکت داروں کے ساتھ مل کر کام کرے گی اور چین- جنوبی افریقہ اور چین- افریقہ باہمی فائدہ مند تعاون کے زیادہ مفید نتائج حاصل کرنے کے لئے اپنا بھرپور کردار ادا کرے گی۔