بوآؤ، ہائی نان (شِنہوا) چین کے جنوبی صوبے ہائی نان میں ہائی نان فری ٹریڈ پورٹ (ایف ٹی پی) نے جزیرے بھر میں جاری خصوصی کسٹمز آپریشنز کے پہلے 100 دنوں کے دوران حاصل ہونے والے ابتدائی نتائج میں زیرو ٹیرف اشیاء کی تجارتی مالیت میں زبردست اضافہ رپورٹ کیا ہے۔
سرکاری طور پر جاری ہونے والے اعداد و شمار کے مطابق اس تاریخی اقدام کے بعد سے فری ٹریڈ پورٹ میں درآمدات اور برآمدات کی مجموعی مالیت 80 ارب یوآن (تقریباً 11.6 ارب امریکی ڈالر) سے تجاوز کر گئی ہے جو گزشتہ سال کے اسی عرصے کے مقابلے میں 32.9 فیصد زائد ہے۔ خاص طور پر زیرو ٹیرف پالیسی کے تحت 186 لین دین ہوئے جن میں تقریباً 1.7 ارب یوآن مالیت کا سامان شامل تھا جو گزشتہ سال کی نسبت 1.46 گنا اضافہ ظاہر کرتا ہے۔ اس دوران کل 27 کروڑ 10 لاکھ یوآن کے محصولات معاف کئے گئے۔
یہ اعداد و شمار 100 دن مکمل ہونے سے ایک دن قبل ایک پریس کانفرنس میں جاری کئے گئے۔
گزشتہ سال 18 دسمبر کو چین نے ہائی نان ایف ٹی پی میں جزیرے بھر کے لئے خصوصی کسٹمز آپریشنز کا آغاز کیا تھا جو رقبے کے لحاظ سے دنیا کی سب سے بڑی فری ٹریڈ پورٹ ہے۔ اس اقدام کا مقصد غیر ملکی اشیاء کے داخلے کو مزید آسان بنانا، زیرو ٹیرف کے دائرہ کار کو وسعت دینا اور کاروبار دوست اقدامات متعارف کرانا ہے۔