لہاسا (شِنہوا) چین کے جنوب مغربی شی زانگ خود مختار علاقے کی درآمدات اور برآمدات کی مجموعی مالیت 2026 کے پہلے 2 ماہ میں تقریباً 1.83 ارب یوآن (26 کروڑ 47 لاکھ امریکی ڈالر) تک پہنچ گئی جو گزشتہ سال کے اسی عرصے کے مقابلے میں 15.4 فیصد زائد ہے۔
لہاسا کسٹمز کی جانب سے جاری کردہ اعداد و شمار کے مطابق برآمدات کی مالیت تقریباً 1.25 ارب یوآن رہی جبکہ درآمدات 57 کروڑ 80 لاکھ یوآن ریکارڈ کی گئیں۔
شی گازے شہر میں ایک زرعی کمپنی کے پیداواری مرکز پر ورکرز تندہی کے ساتھ مقامی سوغات مٹر کی سویوں کے ڈبے ٹرکوں پر لاد رہے تھے جنہیں نیپال بھیجا جانا تھا۔ ایک ہزار 350 کلوگرام پر مشتمل یہ کھیپ خطے کی پھلتی پھولتی زرعی برآمدات کی عکاسی کرتی ہے۔
یہ مصروف منظر شی زانگ کی مجموعی غیر ملکی تجارت کی سرگرمی کو ظاہر کرتا ہے۔ نجی اداروں نے ترقی میں سب سے آگے رہتے ہوئے مجموعی تجارت کا 58.2 فیصد حصہ لیا جس کی مالیت 1.06 ارب یوآن رہی۔ غیر ملکی سرمایہ کاری سے چلنے والی کمپنیوں نے 40 فیصد حصہ ڈالا جن کی تجارتی مالیت 73 کروڑ یوآن تک پہنچی۔
جنوبی ایشیائی ممالک کے ساتھ تجارت 43 فیصد اضافے کے ساتھ 82 کروڑ 80 لاکھ یوآن ہوگئی۔ نیپال کے ساتھ تجارت میں 44.9 فیصد کا بڑا اضافہ دیکھا گیا جو 79 کروڑ 60 لاکھ یوآن تک پہنچ گئی، یہ رقم خطے کی مجموعی تجارت کا 43.6 فیصد بنتی ہے۔