بیجنگ (شِنہوا) چینی صدر شی جن پھنگ نے صدر آصف علی زرداری کو یوم پاکستان کے موقع پر مبارکباد کا پیغام بھیجاہے۔
اپنے پیغام میں چینی صدر نے کہا کہ پاکستان کی حکومت اور عوام طویل عرصے سے اپنی قومی خودمختاری، آزادی، علاقائی سالمیت اور قومی وقار کا مضبوطی سے تحفظ کر رہے ہیں، مختلف خطرات اور مسائل پر قابو پا رہے ہیں اور قومی ترقی کو آگے بڑھا رہے ہیں جس سے خطے میں امن، استحکام، ترقی اور خوشحالی میں اہم کردار ادا ہوا ہے۔
انہوں نے مزید کہا کہ چین ایک قریبی دوست کی حیثیت سے پاکستان کی کامیابیوں پر دلی خوشی محسوس کرتا ہے۔
انہوں نے زور دیا کہ اس سال چین کے 15 ویں پانچ سالہ منصوبے کا آغاز اور چین-پاکستان سفارتی تعلقات کی 75ویں سالگرہ ہے۔ انہوں نے امید ظاہر کی کہ دونوں فریق اپنی روایتی دوستی کو آگے بڑھائیں گے، تزویراتی روابط اور ترقیاتی حکمت عملیوں کو ہم آہنگ کریں گے اور جدت کے راستے پر مل کر آگے بڑھیں گے۔
شی جن پھنگ نے کہا کہ وہ چین-پاکستان تعلقات کی ترقی کو بہت اہمیت دیتے ہیں اور آصف علی زرداری کے ساتھ مل کر ایک نئے دور میں چین-پاکستان مشترکہ مستقبل کی تعمیر کو تیز کرنے اور دونوں ممالک کے عوام کو زیادہ فوائد پہنچانے کے لئے تیار ہیں۔
چین کے وزیرِاعظم لی چھیانگ نے بھی وزیراعظم محمد شہباز شریف کو یوم پاکستان پر مبارکباد کا پیغام بھیجا۔