اسلام آباد (نیشنل ٹائمز) پاکستان نے امریکی ڈائریکٹر نیشنل انٹیلیجنس تلسی گبارڈ کے پاکستان کے میزائل پروگرام سے متعلق بیان کو یکسر مسترد کر دیا ہے۔

ترجمان دفتر خارجہ طاہر اندرابی نے کہا کہ پاکستان کی تذویری صلاحیتیں مکمل طور پر دفاعی نوعیت کی حامل ہیں اور ان کا مقصد قومی خودمختاری کا تحفظ ہے۔

انہوں نے واضح کیا کہ پاکستان کا میزائل پروگرام خطے میں امن و استحکام برقرار رکھنے کے لیے ہے اور کسی بھی جارحانہ عزائم کا حصہ نہیں۔ طاہر اندرابی نے کہا کہ پاکستان کے میزائل پروگرام کی حد بین البراعظمی سے کہیں کم ہے اور یہ کم از کم دفاعی صلاحیت کے اصول پر قائم ہے۔

ترجمان نے بھارت کی 12 ہزار کلومیٹر سے زائد رینج رکھنے والی میزائل صلاحیتوں کو علاقائی سلامتی کے لیے تشویش کا باعث قرار دیا۔

انہوں نے مزید کہا کہ پاکستان امریکا کے ساتھ باہمی احترام، عدم امتیاز اور حقائق پر مبنی تعلقات کا خواہاں ہے اور جنوبی ایشیا میں امن، سلامتی اور استحکام کے لیے متوازن و ذمہ دارانہ رویہ ضروری ہے۔

خیال رہے کہ امریکی سینیٹ کمیٹی میں سماعت کے دوران تلسی گبارڈ نے کہا تھا کہ پاکستان کے طویل فاصلے تک مار کرنے والے میزائل پروگرام میں ممکنہ طور پر ایسے بین البراعظمی بیلسٹک میزائل شامل ہو سکتے ہیں جو امریکا تک پہنچنے کی صلاحیت رکھتے ہوں۔

تلسی گبارڈ نے یہ بھی کہا کہ پاکستان سمیت روس، چین، شمالی کوریا اور ایران ایسے جدید میزائلوں پر تحقیق کر رہے ہیں جو جوہری اور روایتی ہتھیار لے جانے کی صلاحیت رکھتے ہیں اور امریکا کو نشانہ بنا سکتے ہیں۔