اسلام آباد (نیشنل ٹائمز) امریکا نے متحدہ عرب امارات کو جدید دفاعی نظام فروخت کرنے کی منظوری دے دی ہے جس کی مالیت تقریباً 4.5 ارب ڈالر ہے۔

امریکی حکام کے مطابق اس معاہدے کے تحت یو اے ای کو جدید لانگ رینج ریڈار فراہم کیا جائے گا جو دور سے آنے والے میزائلوں اور ڈرونز کو نشانہ بنانے کی صلاحیت رکھتا ہے۔

امریکی وزیر خارجہ نے اس دفاعی معاہدے کی ہنگامی بنیادوں پر منظوری دی ہے۔

امریکی محکمہ خارجہ کے مطابق یہ جدید ریڈار تھاڈ (THAAD) سسٹم کے ساتھ منسلک ہوگا اور سرحد تک پہنچنے سے پہلے ہی بیلسٹک میزائلوں کو تباہ کرنے کی صلاحیت رکھتا ہے۔

حکام کا کہنا ہے کہ معاہدے میں 12 جدید سینسرز اور کمیونیکیشن سسٹمز بھی شامل ہیں جبکہ متحدہ عرب امارات کو 2 کنٹرول سینٹرز بھی فراہم کیے جائیں گے۔

امریکی حکام کے مطابق اس جدید دفاعی نظام سے امارات اپنی فضائی حدود کو ہر سمت سے زیادہ مؤثر انداز میں محفوظ بنا سکے گا۔

امریکی محکمہ خارجہ کا کہنا ہے کہ یہ معاہدہ خطے میں سکیورٹی کو بہتر بنانے کے لیے اہم پیش رفت ہے جبکہ امریکا اس کے ساتھ تربیت، تکنیکی معاونت اور 5 سالہ سروس بھی فراہم کرے گا۔