تہران (شِنہوا) ایرانی وزیر خارجہ سید عباس عراقچی نے امریکی صدر کے خصوصی ایلچی سٹیو وٹکوف کے ساتھ کسی بھی قسم کے نئے رابطے کی سختی سے تردید کر دی ہے۔
انہوں نے یہ بات منگل کی صبح سوشل میڈیا پلیٹ فارم ایکس پر ایک پوسٹ میں کہی جس میں انہوں نے امریکی میڈیا آؤٹ لیٹ ایکسیوس کی اس رپورٹ پر ردعمل ظاہر کیا جس میں ایسے رابطوں کا دعویٰ کیا گیا تھا۔ یہ بیان ایک ایسے وقت میں سامنے آیا ہے جب ایران کے خلاف امریکہ اور اسرائیل کی فوجی مہم اپنے 18 ویں دن میں داخل ہو چکی ہے۔
عراقچی نے کہا کہ مسٹر وٹکوف کے ساتھ میرا آخری رابطہ ان کے آجر (صدر) کے اس فیصلے سے پہلے ہوا تھا جس کے تحت ایران پر ایک اور غیر قانونی فوجی حملے کے ذریعے سفارت کاری کا قتل کیا گیا۔
انہوں نے مزید کہا کہ اس کے برعکس کوئی بھی دعویٰ محض تیل کے تاجروں اور عوام کو گمراہ کرنے کے لئے معلوم ہوتا ہے۔