پشاور (نیشنل ٹائمز) خیبر پختونخوا کے ضلع لکی مروت میں دہشتگردی کا افسوسناک واقعہ پیش آیا ہے،پولیس گاڑی کے قریب دھماکے کے نتیجے میں ایس ایچ او سمیت 6 پولیس اہلکار شہید ہو گئے۔ میڈیا رپورٹس کے مطابق پولیس گاڑی کے قریب دھماکے کے نتیجے میں ایس ایچ او سمیت 6 اہلکار جان کی بازی ہار گئے۔ ترجمان پولیس کا کہنا ہے کہ دھماکا اس وقت ہوا جب پیٹرولنگ ٹیم معمول کی گشت پر تھی اور نامعلوم حملہ آوروں نے گاڑی کو نشانہ بنایا۔

واقعے کے بعد سیکیورٹی فورسز نے علاقے کو گھیرے میں لے کر سرچ اور تحقیقات کا آغاز کر دیا ہے۔ وفاقی وزیرِ داخلہ محسن نقوی نے واقعے کی شدید مذمت کرتے ہوئے ایس ایچ او سمیت شہید ہونے والے تمام پولیس اہلکاروں کو خراجِ عقیدت پیش کیا ہے۔ وزیرِ داخلہ نے شہداء کے لواحقین سے دلی ہمدردی اور تعزیت کا اظہار کرتے ہوئے کہا کہ خیبر پختونخوا پولیس کے بہادر جوانوں نے اپنا آج قوم کے پرامن کل کے لیے قربان کیا۔ انہوں نے کہا کہ خیبر پختونخوا پولیس کے افسران اور جوانوں نے دہشت گردی کے خلاف جنگ میں لازوال قربانیاں دی ہیں اور شہداء قوم کا فخر ہیں جن کی قربانیاں ہمیشہ یاد رکھی جائیں گی۔