اسلام آباد (نیشنل ٹائمز) وفاقی وزیر اطلاعات و نشریات چوہدری فواد حسین نے کہا ہے کہ یونیورسٹیز کا جدید ٹیکنالوجی میں اہم کردار ہے، سائنس و ٹیکنالوجی اور تعلیم کی وزارت نے پاکستان کا مستقبل روشن کرنا ہے، ملک میں اس وقت 217یونیورسٹیاں کام کر رہی ہیں، صوبوں اور وفاق کی تعلیم آگے لے کر جانے کیلئے ہمیں مل کرکام کرنا ہوگا۔جمعہ کووفاقی وزیر اطلاعات و نشریات چوہدری فواد حسین نے تقریب سے خطاب کرتے ہوئے کہا کہ افسوس ہے کہ قومی اسمبلی گھریلو تشدد کے حوالے سے بل پاس نہیں کر سکی،پاکستان کا بچائو تب ہی ممکن ہے جب قائد اعظم اور علامہ اقبال کی نظریات پر مبنی جدید مسلم ریاست قائم کریں گے۔ انہوں نے کہا کہ افغانستان کے واقعات کا اثر پاکستان پر بھی پڑتا ہے، ہم کابل میں ایسی حکومت چاہتے ہیں جو عوام کی نمائندہ ہو، نیٹو افواج کے انخلاء کے بعد افغان حکومت پتوں کی طرح بکھر گئی ہے، افغان قیادت کے اثاثہ اور خاندان بیرون ملک مقیم ہیں جبکہ افغان عوام غربت اور مشکلات میں مبتلاہیں، کابل میں ایسی حکومت کے خواہاں ہیں جس سے تمام سیاسی جماعتوں اور عوام متفق ہوں، ہم طالبان کو مذاکرات کی میز پر لائے، افغان بچوں کو سکالر شپ کی سہولت دی جا رہی ہے، 6ہزار بچے اس وقت پاکستان کی مختلف یونیورسٹیز میں زیر تعلیم ہیں۔