وزیرِاعظم عمران خان نے کہا ہے کہ بھارتی ظلم و بربریت کے خلاف ہر فورم پر آواز اٹھاتے رہیں گے۔
تفصیلات کے مطابق وزیرِاعظم عمران خان سے وزیرِ اعظم آزاد جموں کشمیر سردار عبدالقیوم نیازی کی ملاقات ہوئی جس میں آزاد کشمیر کی مجموعی صورتحال اور آئندہ کیلئے تعمیر و ترقی کے لائحہ عمل پر گفتگو کی گئی۔
ملاقات میں وزیرِاعظم عمران خان نے سردار عبدالقیوم نیازی کو وزارتِ عظمی آزاد کشمیر کے عہدے پر منتخب ہونے پر مبارکباد پیش کی
اس موقع پر وزیرِاعظم آزاد کشمیر سردار عبدالقیوم نیازی نے ان پر اعتماد کرنے پر وزیرِ اعظم عمران خان کا شکریہ ادا کیا۔
سردارعبدالقیوم نیازی نے کہا کہ میری حکومت کی ترجیح آزاد جموں و کشمیر کے عوام کے مسائل کا حل ہے، سرحد پار اپنے ان بہن بھائیوں کے مسائل کو عالمی سطح پر اجاگر کرنے کے لیے بھی ہر ممکنہ کوشش کرنا ہے
وزیرِاعظم آزاد کشمیر سردار عبدالقیوم نیازی نے مزید کہا کہ مقبوضہ کشمیر کے شہری غیر قانونی تسلط میں بے پناہ مسائل کا شکار اور صعوبتیں برداشت کر رہے ہیں۔
ملاقات میں وزیرِاعظم عمران خان نے کہا کہ پاکستان کی حکومت اورعوام کشمیریوں کے حقِ خود ارادیت کے حصول کی جدوجہد میں انکے ساتھ شانہ بشانہ کھڑے ہیں، بھارتی ظلم و بربریت کے خلاف ہر فورم پر آواز اٹھاتے رہیں گے۔