یہ خوبرو شامی نوجوان مسلسل سات گھنٹے کھڑے ہو کر رات بھر تلاوتِ قرآن کرتا رہا۔ حلب سے تعلق رکھنے والے عبدالرحمن نے اس سے قبل بھی یہ کوشش کی تھی، مگر پندرہ پارے پڑھنے کے بعد اس کی ٹانگوں نے جواب دے دیا تھا۔ اس کے باوجود اس نے ہمت نہیں ہاری اور بالآخر اپنے خواب کو حقیقت میں بدلنے میں کامیاب ہوگیا۔
عبدالرحمن کی عمر 20 سال ہے۔ اس کا تعلق اگرچہ شام کے شہر حلب سے ہے، لیکن اس وقت وہ ترکیہ میں مولانا رومؒ کے شہر قونیا میں مقیم ہے۔ اس نے قیامُ اللیل کی نماز میں ایک ہی رکعت میں پورا قرآنِ کریم مکمل کیا، جس میں 60 حزب، 240 ربع اور 6,236 آیات کی تلاوت شامل تھی۔
عبدالرحمن کا کہنا ہے:
“میری تلاوت نماز کی روح سے خالی نہیں تھی اور نہ ہی یہ محض الفاظ کا تکرار تھا، بلکہ یہ مکمل توجہ، شعور اور خشوع کے ساتھ کی گئی تلاوت تھی۔”
اس نے مزید بتایا:
“میں ہمیشہ سنتا آیا تھا کہ حضرت عثمان بن عفان رضی اللہ عنہ رات کی نماز ایک رکعت میں ادا کیا کرتے تھے۔ یہی بات میرے ذہن میں آئی اور اسی خیال سے میرے خواب کا آغاز ہوا۔”
عبدالرحمن قونیا کی سلجوق یونیورسٹی میں نفسیات کے شعبے میں دوسرے سال کا طالبِ علم ہے۔ اس نے بتایا کہ وہ پہلے بھی اس خواب کو پورا کرنے کی کوشش کر چکا تھا، لیکن اس وقت وہ تلاوت میں پوری طرح توجہ مرکوز نہ کر سکا، جس کی وجہ سے اس نے اس ارادے کو مؤخر کر دیا تاکہ بہتر تیاری کے ساتھ اسے پورا کیا جا سکے۔
مصری اخبار “الوطن” کی رپورٹ کے مطابق، عبدالرحمن نے عشاء کی نماز کے بعد کچھ دیر آرام کیا اور پھر قیامُ اللیل کا آغاز کیا۔ وہ پوری رات ترتیل کے ساتھ قرآن کی تلاوت کرتا رہا اور صبح تک عمّ پارہ پڑھ چکا تھا۔ اس نے اس بات پر خاص زور دیا کہ اس کا مقصد صرف اللہ تعالیٰ کی رضا حاصل کرنا تھا، نہ کہ شہرت یا دکھاوا۔
عبدالرحمن نے کہا:
“اگر نیت اللہ کے لیے خالص نہ ہو تو دنیا اور آخرت دونوں میں نقصان ہوتا ہے۔ میں نے بہت طویل وقت کھڑے ہو کر گزارا، میرے پاؤں اور جسم میں شدید درد ہوا، اور اگر نیت خالص نہ ہوتی تو آخرت کا کوئی اجر بھی نہ ملتا۔”
اس نے سردیوں کی رات کا انتخاب اس لیے کیا تاکہ اپنے مقصد کو نسبتاً آسانی سے پورا کر سکے۔ اس کا کہنا تھا:
“گرمیوں میں تھوڑی سی محنت سے بھی بہت زیادہ پسینہ آتا ہے، جبکہ سردیوں کی راتیں طویل بھی ہوتی ہیں۔”
اس نے یہ بھی فیصلہ کیا کہ وہ یہ طویل نماز مسجد میں ادا کرے گا تاکہ گھر میں کسی قسم کا خلل واقع نہ ہو۔
واضح رہے کہ دو صحابہ کرام اور دو تابعین کے بارے میں مشہور ہے کہ انہوں نے ایک رکعت میں قرآنِ کریم مکمل کیا تھا۔ صحابہ میں سیدنا عثمان بن عفان اور سیدنا عدی بن حاتم رضی اللہ عنہما شامل ہیں، جبکہ تابعین میں امام ابو حنیفہ اور سیدنا سعید بن جبیر رحمہما اللہ تعالیٰ کے نام آتے ہیں۔
واللہ اعلم۔