اسلام آباد (آئی این پی) جموں اینڈ کشمیر لبریشن فرنٹ (جے کے ایل ایف) کے سربراہ یاسین ملک کی اہلیہ و حریت رہنما مشال ملک نے کہا ہے کہ کشمیر کی صورتحال گھمبیر ہوتی جارہی ہے، بھارت نے کشمیریوں کی شناخت، سیاسی ، معاشی اور مذہبی حقوق چھین لیے ہیں،دنیا کو کشمیر پر توجہ دینا ہوگی،دنیا لاک ڈائون میں رہی، کشمیری 70 سال سے اس صورتحال سے دوچار ہیں۔جمعرات کو نجی ٹی وی سے گفتگو کرتے ہوئے مشال ملک نے کہا کہ کشمیریوں کی تکلیف کا اندازہ نہیں لگا سکتے، 5 اگست کے اقدام کو 2 سال ہوگئے ہیں، کشمیریوں کی شناخت، سیاسی ، معاشی اور مذہبی حق چھین لیا گیا ہے ،دنیا کو کشمیر کی صورتحال پر ایکشن لینا پڑے گا، 5 اگست کے بھارتی اقدام کے خلاف دنیا بھر میں احتجاج ہوا تھا۔ انہوں نے کہا کہ بدقسمتی سے جب بھارتی ایکٹ کے خلاف دنیا میں آگاہی پیدا ہورہی تھی تو کورونا آگیا، دنیا کی توجہ کورونا پر مرکوز ہوگئی، کورونا کے خاتمہ کے بعد دنیا کو کشمیر پر توجہ دینا ہوگی۔انہوں نے کہا کہ کورونا کے دوران دنیا لاک ڈائون میں رہی، کشمیری 70 سال سے اس صورتحال سے دوچار ہیں۔