اسلام آباد(نیشنل ٹائمز) وزیر مملکت قانون و انصاف بیرسٹر عقیل ملک نے کہا ہے کہ عمران خان اور بشریٰ بی بی کیخلاف آج کا فیصلہ آئین و قانون کے مطابق آیا ہے۔
بیرسٹر عقیل ملک نے اپنے ایک بیان میں کہا ہے کہ بانی پی ٹی آئی واضح طور پر قانون کی خلاف ورزی کے مرتکب ہوئے ہیں، بانی پی ٹی آئی عمران خان اور اہلیہ بشریٰ بی بی نے بلگری جیولری سیٹ کی کم قیمت لگوائی۔دوسری جانب وزیر مملکت برائے خزانہ بلال اظہر کیانی نے اپنے ایک بیان میں کہا ہے کہ تحفہ توشہ خانہ میں جمع کرانا لازمی تھا، تحفہ کوڑیوں کے داموں خرید کر فراڈ کیا گیا۔واضح رہے کہ توشہ خانہ ٹو کیس میں بانی پی ٹی آئی اور بشریٰ بی بی کو 10،10 سال قید کی سزا سنا دی گئی ہے۔بانی پی ٹی آئی اور بشریٰ بی بی کو پاکستان پینل کوڈ (پی پی سی) کی دفعہ 409 کے تحت 7، 7 سال قید کی بھی سزا سنائی گئی، مجموعی طور پر دونوں کو 17، 17 سال کی سزا سنائی گئی جبکہ ان دونوں کو ایک کروڑ 64 لاکھ روپے فی کس جرمانے کی سزا بھی سنائی گئی ہے۔احتساب عدالت کے سپیشل جج سینٹرل شاہ رخ ارجمند نے اڈیالہ جیل میں عمران خان اور بشریٰ بی بی کی موجودگی میں توشہ خانہ ٹو کیس کا فیصلہ سنایا۔