لاہور(نیشنل ٹائمز) ملک کے مختلف شہروں میں دھند کے ڈیرے برقرار ہیں، دھند کے باعث ٹریفک حادثات میں 3 افراد جاں بحق جبکہ 20 زخمی ہوئے ہیں۔
بس الٹنے سے تین افراد جاں بحق جبکہ 15 زخمی ہو گئے، زخمیوں کو رحیم یار خان کے ہسپتال منتقل کر دیا گیا، متعدد کی حالت تشویشناک بتائی گئی ہے، ظاہر پیر انٹرچینج کے قریب بھی بس الٹ گئی جس کے باعث 5 مسافر زخمی ہو گئے۔واضح رہے کہ ملک کے مختلف علاقوں میں دھند کے ڈیرے برقرار ہیں، موٹرویز متعدد مقامات سے بند کر دی گئی ہے، موٹروے ایم 2 لاہور سے ہرن مینار، ایم 3 فیض پور سے رجانہ تک بند کر دی گئی ہے، موٹروے ایم 4پنڈی بھٹیاں سے ملتان اور ایم 5 ملتان سے روہڑی تک دھند کی وجہ سے بند کی گئی ہے۔قومی شاہراہوں پر بھی حد نگاہ کم ہونے سے ٹریفک کی روانی متاثر ہے، مانگا منڈی، پتوکی، اوکاڑہ اور ساہیوال میں دھند کا راج ہے، اس کے علاوہ چیچہ وطنی، میاں چنوں، خانیوال، ملتان، لودھراں، بہاولپور، رحیم یار خان ا ور صادق آباد میں بھی دھند کے ڈیرے ہیں۔ترجمان موٹروے پولیس کا کہنا ہے کہ شہری غیر ضروری سفر سے گریز اور فوگ لائٹس کا استعمال یقینی بنائیں۔اس کے علاوہ ملک کے مختلف شہروں میں فضائی آلودگی برقرار ہے، لاہور میں ایئر کوالٹی انڈیکس 224 ریکارڈ کیا گیا ہے، فیصل آباد میں اے کیو آئی 273، گجرات میں 270 ریکارڈ کیا گیا، جبکہ خیبرپختونخوا کی فضا بھی آلودہ ہے، پشاور میں ایئر کوالٹی انڈیکس 258 تک پہنچ گیا ہے۔