اسلام آباد(نیشنل ٹائمز) سپریم کورٹ کے جج جسٹس قاضی فائز عیسیٰ نے عوام سے اپیل کی ہے کہ کورونا ایس او پیز پر عملدرآمد کریں،ماسک پہنیں اور سماجی فاصلے کو برقرار رکھیں۔ جسٹس قاضی فائز عیسیٰ نے قائداعظم انٹرنیشنل ہسپتال سے عوام کیلئے پیغام میں کہاکہ قائد اعظم انٹرنیشنل ہسپتال میں میرا بہترین علاج ہورہا ہے،پوری قوم کا شکرگزار ہوں جس نے میری اور اہلیہ کی صحتیابی کیلئے دعا کی۔ انہوں نے کہاکہ ویکسین لگوانے کے باوجود مجھے ہسپتال داخل ہونا پڑا۔انہوں نے کہاکہ عوام سے اپیل کرتا ہوں کہ کورونا ایس او پیز پر عملدرآمد کریں،ماسک پہنیں اور سماجی فاصلے کو برقرار رکھیں۔ انہوں نے کہاکہ عیدالاضحی پر کندھے سے کندھا ملا کر نماز عید ادا کی گئی،پوری قوم تمام جگہوں پر کورونا ایس او پیز کا خیال رکھے۔ انہوں نے کہاکہ ٹیلی ویژن پر طبی ماہرین اور علما لوگوں کو احتیاطی تدابیر بارے آگاہی دیں،ویکسینیشن سمیت تمام ضروری احتیاط کے باجود مجھے اور اہلیہ کو ڈیلٹا کورونا ہوا۔ انہوں نے کہاکہ ہم ان دو فیصد خوش قسمت لوگوں میں سے ہیں جن کو سب سے پہلے چین کے تعاون سے ویکسین لگی،آئین کا آرٹیکل 9 زندگی کے تحفظ کا ضامن ہے۔