لاہور(نیشنل ٹائمز)گورنر پنجاب سردار سلیم حیدر خان نے کہا ہے کہ صوبوں کی تقسیم کے حوالے سے پارٹی کی سی ای سی کے اجلاس میں ابھی کوئی بات نہیں ہوئی۔
صوبائی دارالحکومت میں میڈیا سے گفتگو کرتے ہوئے سردار سلیم حیدر خان کا کہنا تھا کہ پیپلزپارٹی کے لئے تنظیم سازی کے بغیر آگے بڑھنا مشکل ہے، ہوم ورک مکمل اور فیصلہ ہو چکا ہے۔اُنہوں نے کہا کہ بلاول بھٹو ملک سے باہر ہیں، واپسی پرلاہور کے صدر کا ایک ہفتے تک نوٹیفکیشن جاری ہو جائے گا، پی پی پی کا کل یوم تاسیس ہے اس پر بھی لوگوں کی کثیر تعداد موجود ہو گی، ایک کال پر ہزاروں لوگ اکٹھے ہو جاتے ہیں۔گورنر پنجاب کا کہنا تھا کہ ناراض کارکنوں کومنا رہے ہیں مزید پارٹی لیڈر شپ بھی جلدی متحرک ہو گی ،وزیر اعلیٰ کے پی کے کو بانی پی ٹی آئی سے ملنے کی اجازت ملنی چاہیے۔سردار سلیم حیدر نے کہا کہ پی ٹی آئی بھی ملک کو مقدم رکھے انہیں موقع ملتا ہے تو اپنے ہی ملک میں آگ لگانا شروع کر دیتے ہیں۔ایک اورسوال کے جواب میں اُن کا کہنا تھا کہ صوبوں کی تقسیم کے حوالے سے پارٹی کی سی ای سی کے اجلاس میں ابھی کوئی بات نہیں ہوئی پھر بات کریں گے۔