برسلز (نیشنل ٹائمز) برسلز میں منعقد ہونے والے چوتھے یورپی یونین انڈو پیسیفک وزارتی فورم کے موقع پر نائب وزیر اعظم اور وزیر خارجہ سینیٹر محمد اسحاق ڈار نے جمہوریہ سلووینیا کی نائب وزیر اعظم و وزیر خارجہ و یورپی امور تنجا فاجون سے ملاقات کی۔
ملاقات کے دوران دونوں رہنماؤں نے پاکستان اور سلووینیا کے درمیان دوطرفہ تعلقات اور یورپی یونین کے وسیع تر فریم ورک میں تعاون کو بڑھانے کے حوالے سے تبادلہ خیال کیا۔ فریقین نے تجارتی و اقتصادی تعاون، علاقائی اور عالمی سلامتی کے امور اور امن و استحکام کے فروغ پر زور دیا۔
اس موقع پر دونوں ممالک کے درمیان دوطرفہ سیاسی مشاورت کے قیام کے لیے مفاہمت نامے پر دستخط بھی کیے گئے۔ ملاقات میں سیکرٹری خارجہ آمنہ بلوچ اور یورپی یونین، بیلجیئم اور لکسمبرگ کے لیے پاکستان کے سفیر رحیم حیات قریشی بھی موجود تھے۔