اسلام آباد(نیشنل ٹائمز)سپریم کورٹ آف پاکستان نے فل کورٹ اجلاس میں سپریم کورٹ رولز 2025 کی منظوری دے دی۔
چیف جسٹس سپریم کورٹ یحییٰ آفریدی کی زیر صدارت فل کورٹ اجلاس ہوا جس میں رولز 2025 میں ترامیم کی منظوری دی گئی۔سپریم کورٹ نے فل کورٹ اجلاس کا اعلامیہ جاری کر دیا جس کے مطابق رولز میں کی گئی تمام اپ ڈیٹس فل کورٹ نے متفقہ طور پر منظور کیں۔فل کورٹ نے کمیٹی کی رپورٹ پر رولز 1980 اور مجوزہ رولز 2025 کا مکمل جائزہ لیا۔اعلامیہ کے مطابق سپریم کورٹ نے ممتاز قانون دان منیر پراچہ کو سینئر ایڈووکیٹ آف دی سپریم کورٹ کا درجہ دے دیا۔عدالتی کارکردگی بہتر بنانے، نظامِ عدل میں شفافیت بڑھانے اور عمل میں آسانی کیلئے نئے رولز مرتب کئے گئے، مقدمات کے دوران سامنے آنے والی مختلف مشکلات کے حل کیلئے کمیٹی کی تجاویز رولز میں شامل کر دی گئیں۔اعلامیہ کے مطابق فل کورٹ نے کمیٹی کے ہر رکن کی انفرادی طور پر تعریف کی، کمیٹی میں جسٹس شاہد وحید، جسٹس عرفان سعادت، جسٹس نعیم اختر افغان اور جسٹس عقیل عباسی شامل تھے۔