صنعا (نیشنل ٹائمز) اسرائیلی فوج کی یمنی دارالحکومت صنعا پر شدید بمباری کرتے ہوئے حوثی اکثریتی جماعت انصاراللہ کے رہنماؤں اور ہتھیاروں کے گوداموں سمیت 11 ٹھکانوں کو نشانہ بنایا۔
یہ حملہ حوثیوں کی جانب سے اسرائیل کے ساحلی شہر ایلات (ام الرشراش) پر ڈرون حملے کے ایک روز بعد کیا گیا ہے، حوثیوں کے ڈرون حملے میں 20 سے زائد اسرائیلی زخمی ہوئے تھے۔اسرائیلی فوج کے مطابق حملے کے اہداف میں حوثیوں کے جنرل اسٹاف ہیڈکوارٹرز، سکیورٹی اور انٹیلی جنس کمپاؤنڈز اور فوجی کیمپ شامل تھے۔اسرائیلی وزیرِ دفاع اسرائیل کاٹز نے سوشل میڈیا پلیٹ فارم ایکس پر کہا کہ ’ہم نے صنعا میں حوثی دہشت گرد تنظیم کے کئی ٹھکانوں پر طاقتور وار کیا ہے‘۔غیر ملکی خبررساں ایجنسی نے عینی شاہدین کا حوالہ دیتے ہوئے کہا ہے کہ اسرائیلی حملے صنعا کے جنوبی اور مغربی علاقوں پر کیے گئے، یہ حملے اس وقت ہوئے جب حوثی رہنما عبدالملک الحوثی کی ریکارڈ شدہ تقریر نشر ہو رہی تھی۔