اسلام آباد(نیشنل ٹائمز) صدرِ مملکت آصف علی زرداری نے خواتین سفارتکاروں کے عالمی دن پر خواتین کی خدمات کو خراجِ تحسین پیش کرتے ہوئے کہا کہ اقوامِ متحدہ سمیت عالمی فورمز پر خواتین سفارت کار پاکستان کا مؤقف مؤثر انداز میں پیش کر رہی ہیں۔
اپنے پیغام میں صدر پاکستان آصف علی زرداری کا کہنا ہے کہ خواتین سفارت کار امن، مکالمے اور بین الاقوامی تعاون کے فروغ میں کلیدی کردار ادا کر رہی ہیں،پاکستان میں خواتین کی سفارتی خدمات کی روشن روایت موجود ہے، بیگم رعنا لیاقت علی خان اور شائستہ اکرام اللہ نے پاکستان کا وقار عالمی سطح پر بلند کیا۔
انہوں نے کہا کہ شہید محترمہ بینظیر بھٹو نے پاکستان کے عالمی روابط کو مزید مستحکم کیا، پاکستانی خواتین سفیر، مستقل مندوب اور اعلیٰ سفارتی عہدوں پر نمایاں خدمات انجام دے رہی ہیں، موجودہ عالمی چیلنجز کے تناظر میں خواتین سفارت کاروں کی ذمہ داریاں مزید اہم ہوگئی ہیں۔
ان کا کہنا تھا کہ آئینِ پاکستان خواتین اور مردوں کو مساوی حقوق اور یکساں قانونی تحفظ فراہم کرتا ہے، پاکستانی خواتین سفارتی مشنز اور بین الاقوامی تنظیموں میں اہم ذمہ داریاں نبھا رہی ہیں، حالیہ سفارتی پیش رفت نے مسلسل رابطے اور خاموش سفارت کاری کی اہمیت اجاگر کی ہے، پاکستان نے امریکہ اور ایران کے درمیان مفاہمتی عمل میں مثبت کردار ادا کیا۔
صدرِ مملکت نے کہا کہ اقوامِ متحدہ سمیت عالمی فورمز پر خواتین سفارت کار پاکستان کا مؤقف مؤثر انداز میں پیش کر رہی ہیں، خواتین سفارت کاروں کی خدمات نے پاکستان کے بین الاقوامی وقار میں اضافہ کیا ہے۔
آصف علی زرداری کا مزید کہنا تھا کو پاکستان دنیا کے ساتھ سنجیدہ، باوقار اور بامقصد روابط کے فروغ کے لئے پُرعزم ہے۔
