راولپنڈی(نیشنل ٹائمز)پاک فضائیہ کے سربراہ ایئر چیف مارشل ظہیر احمد بابر سدھواور کمانڈر بحرین نیشنل گارڈ جنرل شیخ محمد بن عیسیٰ بن سلمان الخلیفہ نے پاکستان اور بحرین کے درمیان عسکری و ادارہ جاتی تعاون کو فروغ دینے اور بدلتے ہوئے علاقائی چیلنجوں کے تناظر میں دوطرفہ دفاعی تعلقات کو مضبوط بنانے کے عزم پر زور دیا۔
پاک فوج کے شعبہ تعلقات عامہ ( آئی ایس پی آر )کے مطابق پاک فضائیہ کے سربراہ ایئر چیف مارشل ظہیر احمد بابر سدھو سے بحرین نیشنل گارڈ کے کمانڈر جنرل شیخ محمد بن عیسیٰ بن سلمان الخلیفہ نے ایئر ہیڈ کوارٹرز اسلام آباد میں ملاقات کی۔ ملاقات کے دوران دونوں اطراف نے پائیدار دفاعی تعاون کے اپنے عزم کا اعادہ کیااور مشترکہ تربیتی اقدامات اور ہوا بازی کی صنعت میں گہرے تعاون پر خصوصی زور دیا۔جنرل شیخ محمد بن عیسیٰ بن سلمان الخلیفہ نے پاک فضائیہ کے سربراہ کو بھارت کے خلاف حالیہ تنازع میں پاک فضائیہ کی شاندار کارکردگی پر مبارکباد پیش کرتے ہوئے پاک فضائیہ کے اہلکاروں کی پیشہ ورانہ مہارت، آپریشنل تیاری اور غیر معمولی حوصلے کو سراہا۔ کمانڈر بحرین نیشنل گارڈ نے تربیت کے میدان میں تعاون بڑھانے کے لیے اپنی بھرپور خواہش کا اظہار کیا اور مشقوں کے ذریعے مشترکہ سیکھنے کی اہمیت پر زور دیا۔ انہوں نے پاک فضائیہ کے ساتھ دو طرفہ مشقوں اور مشترکہ تربیتی منصوبوں میں بحرین کی فضائیہ کی گہری دلچسپی سے بھی آگاہ کیا۔ پاک فضائیہ کے سربراہ اور کمانڈر بحرین نیشنل گارڈ کے درمیان ہونے والی ملاقات میں دونوں ممالک کے فوجی تعاون کو وسعت دینے ، ادارہ جاتی تعاون کو فروغ دینے اور بدلتے ہوئے علاقائی چیلنجوں کے تناظر میں دوطرفہ دفاعی تعلقات کو مضبوط بنانے کے عزم پر زور دیا گیا۔