اسلام آ باد (آئی این پی ) نور مقدم قتل کیس میں جوڈیشل مجسٹریٹ کی عدالت نے مرکزی ملزم ظاہر جعفر کے جسمانی ریمانڈ میں مزید تین دن کی توسع کر دی۔ بدھ 28جولائی کو جسمانی ریمانڈ میں مزید توسیع کے لیے پولیس نے ملزم ظاہر جعفر کو جوڈیشل مجسٹریٹ محمد شعیب اختر کے روبرو پیش کیا۔ اس موقع پر سرکاری پراسیکیوٹر ساجد چیمہ نے عدالت کو بتایا کہ سی سی ٹی وی فوٹیج حاصل کر لی ہے جس کا فرانزک لاہور لیبارٹری سے کروانا ہے جبکہ ملزم کو بھی وہاں لے کر جانا ہے۔ اسکے علاوہ آلہ قتل اور موبائل فون بھی برآمد کیا جاچکا ہے۔ ملزم کے وکیل انصر نواز کا عدالت میں کہنا تھا کہ سات روز تک جب ملزم جسمانی ریمانڈ پر تھا تب ویڈیو کا فرانزک کیوں نہیں کروایا گیا، پہلی مرتبہ سن رہا ہوں کہ ویڈیو کے فرانزک کے لیے ملزم کا ریمانڈ پر ہونا ضروری ہے۔ سرکاری وکیل نے عدالت سے استدعا کی کہ تین روز کا ریمانڈ دے دیں پھر جیل بھیج دیں گے۔ ملزم کے وکیل کا کہنا تھا کہ ملزم کو جیل سے بھی لے کر جا سکتے ہیں۔ بعدازاں، عدالت نے مرکزی ملزم کو تین روزہ جسمانی ریمانڈ پر پولیس کے حوالے کر دیا۔