انٹرنیشنل ڈیسک(نیشنل ٹائمز) شنگھائی تعاون تنظیم ( ایس سی او) کے سربراہی اجلاس میں چینی صدر شی جن پنگ کی بھارتی وزیر اعظم نریندر مودی سے ملاقات ہوئی جس میں دونوں رہنماؤں نے باہمی تجارت پر زور دیا۔
چین کے شہر تیانجن میں شنگھائی تعاون تنظیم کا سربراہی اجلاس شروع ہوگیا ہے، 2 روزہ اجلاس میں 20 ممالک کے سربراہان شریک ہیں۔چینی صدر شی جن پنگ نے اجلاس میں روس کے صدر پیوٹن، ترک صدر رجب طیب اردوان، وزیراعظم شہباز شریف، بھارتی وزیر اعظم نریندر مودی اور تنظیم میں شامل دیگر رہنماؤں کو خوش آمدید کہا اور ایس سی او فیملی فوٹو بھی بنوایا۔اتوار کو چینی صدر شی جن پنگ کی بھارتی وزیر اعظم نریندر مودی سے ایس سی او اجلاس کی سائیڈلائن میں ملاقات بھی ہوئی۔اس موقع پر بھارتی وزیر اعظم مودی نے کہا کہ متنازع ہمالیائی سرحدی علاقے میں امن و استحکام کا ماحول بن گیا ہے۔بھارتی وزارت خارجہ کے مطابق دونوں رہنماؤں نے باہمی تجارت اور سرمایاکاری بڑھانے کی ضرورت پر زور دیا۔اس کے علاوہ دونوں رہنماؤں کی ملاقات میں علاقائی، عالمی مسائل سمیت دہشت گردی کے چیلنج سے نمٹنے پر بھی تبادلہ خیال ہوا۔