لاہور(نیشنل ٹائمز)پاکستان پیپلز پارٹی کے مرکزی رہنماء و قومی اسمبلی میں سابق اپوزیشن لیڈر خورشیدشاہ و دیگر کے خلاف آمدن سے زائد اثاثہ جات ریفرنس کی سماعت 4اگست تک ملتوی کر دی گئی، تفصیلات کے مطابق سید خورشید احمد شاہ ،ان کے صاحبزادوں ایم پی اے سید فرخ شاہ، زیرک شاہ ،داماد صوبائی وزیر سید اویس قادر شاہ، دو بیگمات سمیت 17ملزمان کے خلاف ایک ارب 23کروڑ روپے سے زائد آمدن کے اثاثے بنانے کے الزام میں دائر ریفرنس کی سماعت سکھر کی احتساب عدالت میں ہوئی، سماعت عدالت کے جج فرید انور قاضی نے کی، اس موقع پر خورشید شاہ کو این آئی سی وی ڈی ہسپتال سے ایمبولینس پر اور ان کے صاحبزادے ایم پی اے فرخ شاہ کو سینٹرل جیل سے بکتر بند گاڑی میں عدالت لاکر پیش کیا گیا،سماعت کے موقع پر عدالت کے باہر سیکیورٹی کے سخت انتظامات رہے،اس دوران نیب کی جانب سے ریفرنسز کے گواہاں عدالت میں پیش ہوئے جن سے خورشید شاہ اور دیگر ملزمان کے وکلا نے کافی دیر تک جرح کی، ان کی جرح جاری تھی کہ عدالت نے سماعت چاراگست تک کے لیے ملتوی کردی۔