لاہور(نیشنل ٹائمز)بھارت کی جانب سے پانی چھوڑنے کے بعد دریائے ستلج اور چناب میں پانی کی سطح میں اضافہ ہوگیا۔
جیو نیوز کے مطابق بھارت نے ایک بار پھر دریائے ستلج اور چناب میں پانی چھوڑ دیا ہے جس کے باعث دریاؤں میں پانی کی سطح بلند ہوگئی ہے۔ رپورٹ کے مطابق ملتان میں بیٹ کے علاقوں میں دیہات زیرِ آب آگئے ہیں جبکہ سیلاب متاثرین کی جانب سے ریسکیو کیمپ قائم نہ کرنے کی شکایات بھی سامنے آئی ہیں اور متاثرین اپنی مدد آپ کے تحت نقل مکانی پر مجبور ہیں۔ قصور کے علاقے گنڈا سنگھ والا میں پانی کی سطح 21فٹ بلند ہوگئی ہے جس کے باعث سیلاب متاثرین کے انخلا کا عمل تیز کردیا گیا ہے اور دیگر اضلاع سے ریسکیو اہلکار اور کشتیاں طلب کرلی گئی ہیں۔ بہاولپور میں بھی ہیڈاسلام پربھی پانی کی سطح بڑھنے سے ہزاروں ایکڑ زرعی اراضی زیر آب آگئی ہے جبکہ بہاولنگر میں عارضی بند ٹوٹنے سے فصلوں کو نقصان ہوا۔ اس کے علاوہ لیہ میں دریائے سندھ میں طغیانی سے پولیس چیک پوسٹ دریا بُرد ہوگئی۔