انٹرنیشنل ڈیسک(نیشل ٹائمز)شام کے دروز اکثریتی شہر سویدا میں دو روز سےجاری فسادات کے بعد دروز رہنماوں کی منظوری سے شامی فوج نے سویدا میں پوزیشن سنبھال لی۔
شامی وزیردفاع نے سویدا میں سیزفائرکا اعلان بھی کردیا، تاہم شہر کے مضافات میں جھڑپیں جاری ہیں اور مزید فوجی دستے تعینات کیے جا رہے ہیں۔شامی وزارتِ دفاع اور وزارت داخلہ نے شہریوں سے گھروں میں رہنے کی اپیل کی اور شہر میں کرفیو نافذ کر دیا ہے ۔شامی سرکاری میڈیا کےمطابق سویدا پر اسرائیلی حملے ہورہےہیں، اسرائیلی وزیراعظم اور وزیردفاع کا کہناہے کہ اسرائیلی فوج کو سویدا میں شامی فوج او ر ان کے ہتھیاروں کو نشانہ بنانےکے احکامات دے دیےگئےہیں۔بیان میں کہا گیا کہ اسرائیل شامی دروز برادری کو نقصان پہنچانے سے شامی حکومت کو روکنے اور شام سے ملحقہ سرحدی علاقے کو غیر فوجی زون بنانے کے لیے اقدامات کر رہا ہے۔سویدا میں ہونے والے نسلی فسادات میں 2 بچوں اور خاتون سمیت 99 افراد ہلاک ہوچکے ہیں،ہلاک ہونے والے بیشترافراد دروز فرقے کے ہیں۔ عرب میڈیا کے مطابق مسلح راہ زنی کے بعد شروع ہونے والی جھڑپیں مقامی دروز فرقے اور بدو قبائل کے درمیان نسلی فسادات میں تبدیل ہوگئی تھیں۔