ممبئی(نیشنل ٹائمز) بھارتی ریاست اتر پردیش کے شہر لکھنؤ میں قرض میں ڈوبے باپ نے فیس بک لائیو پر بیٹی کیلئے مدد کی اپیل کرنے کے بعد خودکشی کر لی۔ریئل اسٹیٹ سے وابسطہ مذکورہ شخص اپنی ذیابیطس کی مریضہ بیٹی کے لیے انسولین تک خریدنے کے قابل نہیں تھا۔ پولیس کا کہنا ہے کہ اس نے دفتر میں سیکیورٹی گارڈ کی بندوق سے خود کو گولی مارلی۔ بھارتی شہری نے اپنی موت سے چند لمحے قبل لائیو ویڈیو میں مشہور شخصیات، صنعتکاروں اور عوام سے اپیل کی تھی کہ وہ اس کے خاندان کی مالی مدد کریں۔ ویڈیو میں وہ مسلسل روتا رہا اور کہہ رہا تھا کہ وہ قرض کے بوجھ اور مالی ذمہ داریوں سے ٹوٹ چکا ہے۔اس نے ویڈیو میں کہا کہ وہ اپنی بیٹی کے لیے انسولین خریدنے کی سکت بھی کھو بیٹھا ہے۔ ویڈیو دیکھنے کے بعد اہل خانہ نے فوراً پولیس کو اطلاع دی، مگر جب تک وہ جائے وقوعہ پر پہنچے، وہ مرچکا تھا۔