بیجنگ(شِنہوا)چین نے بزرگوں کی دیکھ بھال کے اداروں کے لئے ہنگامی ردعمل کا ایک قومی منصوبہ جاری کر دیا ہے جس کا مقصد ان اداروں کو غیر متوقع بحرانوں اور ہنگامی حالات سے بہتر طور پر نمٹنے کے لئے تیار کرنا ہے۔
وزارت شہری امور نے پیر کے روز بتایا کہ اس منصوبے کا مقصد ہنگامی ردعمل کے نظام کو بہتر بنانا اور شہری امور کے حکام و بزرگوں کی دیکھ بھال کے اداروں کی بحرانوں سے نمٹنے کی صلاحیت کو موثر اور ردعمل کے طریقہ کار کو معیاری بنانا ہے۔
یہ منصوبہ ایک ایسے وقت میں جاری کیا گیا ہے جب چین کو تیزی سے بڑھتی ہوئی عمر رسیدہ آبادی کا سامنا ہے۔ 2024 کے آخر تک ملک میں 60 سال یا اس سے زائد عمر کے افراد کی تعداد 31 کروڑ سے تجاوز کرگئی ہے جو مجموعی آبادی کا تقریباً 22 فیصد بنتی ہے۔
نیا جاری کردہ منصوبہ وسیع پیمانے پر ہنگامی صورتحال کا احاطہ کرتا ہےجس میں قدرتی آفات، حادثات، صحت عامہ کے واقعات اور عوامی نظم و نسق کو متاثر کرنے والے واقعات شامل ہیں۔
یہ منصوبہ ہنگامی حالات کی درجہ بندی، ہنگامی ردعمل نظام کو فعال کرنے اور بچاؤ و بحالی کی کارروائیوں کو نافذ کرنے کے لئے واضح پروٹوکولز کا تعین کرتا ہے۔
یہ دستاویز بحران کے بعد کی مدد اور تحقیقات، عوامی آگاہی اور معمول کی مشقوں و تربیتی سیشنز کے لئے بھی رہنما اصول فراہم کرتی ہے۔