بیجنگ (شِنہوا) چین ملک بھر میں زیادہ طاقتور چارجنگ سہولیات کے نیٹ ورک کو مزید بہتر بنائے گا اور ایک ہائی پاور چارجنگ انفراسٹرکچر نظام کی بتدریج تعمیر کرے گا جو موزوں ترتیب، بہتر معیار اور جدید ٹیکنالوجی پر مبنی ہوگا۔
قومی ترقی و اصلاحات کمیشن اور 3 دیگر سرکاری اداروں نے پیر کے روز مشترکہ طور پر ایک مراسلہ جاری کیا ہے جس میں کہا گیا ہے کہ الیکٹرک گاڑیوں کے لئے چارجنگ کا بنیادی ڈھانچہ نئی توانائی گاڑیوں (این ای وی) کی صنعت کی ترقی، نئے پاور سسٹم کی تعمیر اور نقل و حمل و توانائی کے شعبوں میں ماحول دوست اور کم کاربن کی منتقلی کے فروغ کے لئے اہم ہے۔
مقامی اقتصادی ترقی، نئی توانائی والی گاڑیوں کے فروغ کی شدت اور توانائی وسائل کی تقسیم کی بنیاد پر ہائی پاور چارجنگ سہولیات کو مقامی حالات کے مطابق اعتدال پسند حد تک جدید اور سائنسی طور پر موزوں ترتیب کے تحت تیار کیا جانا چاہیے جس کا خاص زور چارج اینڈ گویعنی فوری چارجنگ کے منظر نامے پر ہو۔
چین کا ہدف ہے کہ 2027 کے آخر تک ملک بھر میں ایک لاکھ سے زیادہ ہائی پاور چارجنگ کی سہولیات نصب کی جائیں۔ اس کے ساتھ ساتھ سروس کے معیار اور تکنیکی اطلاق میں بھی نمایاں بہتری لائی جائے۔
مراسلے میں کہا گیاہے کہ چین ہائی پاور چارجنگ ٹیکنالوجی کے اختراعی اطلاق کو بھی فروغ دے گا۔ چارجنگ کے آلات کی تکنیکی بہتری کو بڑھایاجائے گا تاکہ ان سہولیات کی عملی کارکردگی اور سروس لائف میں اضافہ ہو سکے۔