لاہور (نیشنل ٹائمز) پاکستان فلم انڈسٹری کے سینئر ترین اور باکمال رائٹر، ڈائریکٹر و پروڈیوسر اقبال رضوی آج 92 برس کی عمر میں حرکتِ قلب بند ہونے کے باعث انتقال کر گئے۔ وہ ایک طویل عرصے سے علیل تھے۔

اقبال رضوی مرحوم نے 1960 کی دہائی میں فلمی دنیا میں قدم رکھا اور اپنے کیرئیر کے دوران 200 سے زائد معیاری و اعلیٰ فلموں میں بطور مصنف اور ہدایت کار خدمات انجام دیں۔ ان کی معروف فلموں میں ہیرا اور پتھر، میاں بیوی راضی، روشنی، مٹھی بھر چاول (راجندر سنگھ بیدی کے ناول “اک چادر میلی سی” سے ماخوذ)، تھوڑی سی بے وفائی اور کھلونا شامل ہیں۔

مرحوم نے فلم ڈائریکٹر میڈم سنگیتا کے ساتھ سب سے زیادہ کام کیا اور ان کے لیے کئی کامیاب فلمیں تحریر کیں۔ علاوہ ازیں، انہوں نے متعدد ٹی وی ڈرامے بھی لکھے، جو اپنی کہانی، مکالموں اور معنویت کے باعث ناظرین میں مقبول ہوئے۔

اقبال رضوی کو ان کی علمی بصیرت، شائستہ مزاج، شفقت، اور خوبصورت شخصیت کی بنا پر فلمی و ادبی حلقوں میں نہایت عزت و احترام کی نظر سے دیکھا جاتا تھا۔ ان کی وفات پر پاکستان فلم انڈسٹری سے وابستہ شخصیات نے گہرے دکھ اور افسوس کا اظہار کرتے ہوئے ان کی مغفرت اور درجات کی بلندی کے لیے دعائیں کیں۔